Way kontrabando sa Mandaue CJ
CEBU, Philippines — Walay mga kontrababdo sama sa mahait nga hinagiban ug ilegal nga drugas nga nasakmit sulod sa Mandaue City Jail atol sa greyhound operation sayo kagahapon sa buntag gawas lang sa duha ka cellphones ug USB.
Matud sa jail warden, Senior Supt. Renante Rubio, nga ang gihimo kagahapon “finishing touches” na lang sanglit una na silang nihimo og lima ka sunod-sunod nga greyhound operation diin may duha gihapon ka cellphones ang nasakmit.
Kini subay sa mando sa ilang labaw sa pagpahigayon og Oplan Paglilinis sa tanan prisohan lukop nasud ubos sa Bureau of Jail Management and Penology.
Susihon ang mga mensahe sa nakuha nga cellphones kung gigamit ba kini sa ilegal nga kalihukan sa mga piniriso ug sa ilang kontak sa gawas.
Matud ni Rubio nga 75 porsiyento sa mga piniriso sa MCJ adunay kaso sa ilegal nga drugas hinungdan nga daghan gyud ang magtinguha nga mopalusot apan dili sab sila mohunong sa pagsikop ug pagpasaka og kaso sa mga masakpan.
Sumala pa ni Rubio nga ang paraphernalia nga ilang nakit-an posibleng diha lang kini sa sulod gihimo.
Ang jail warden sa female dorm, Supt. Stephany Fernandez- Salazar, malipayon nga walay kontrabando nga nasakmit gikan sa mga selda sa kababayen-an.
Matud ni Salazar nga sukad masukad wala pay nakuhaan og kontrabando sa female dorm facility. (BANAT NEWS)
- Latest