Mga sam-ang sa siyudad giinspeksyon
CEBU, Philippines — Sayo nga mihimo og inspeksiyon sa mga sam-ang sa dakbayan sa Sugbo ang Cebu City Disaster Risk Reduction Management Office diin gihimo kini isip pagpangandam sa nagkaduol nga pag-obserbar sa Kalag-kalag.
Kini tungod kay modagsa ang daghang tawo nga mobisita sa ilang mga minahal sa kinabuhi nga mitaliwan na sa laing kalibutan.
Tulo ka mga dagkong sam-ang ang gibisita sa CCDRRMO nga gilangkuban sa Pardo, Calamba ug Carreta Public Cemetery ug namutang sila og emergency hotlines ug nisusi sa lugar.
Sigon ni Harold Alcontin, Operations Chief sa CCDRRMO ang ilang gibuhat kabahin ni sa ilang Emergency Preparedness and Response plan alang sa Oplan Kalag-kalag 2017.
Gihulagway ni Alcontin usa kini ka pro-active measure sanglit gisusi nila ang mga sam-ang kun dunay hazard aron malikayan ang mga disgrasya atol sa kalag-kalag.
Gitataw ni Alcontin, importante gyud nga sayo pa lang masusi nang daan ang mga sam-ang aron kun unsay mga problema mahatagan dayon kini og pagtagad.
Gani ang Cebu City Health Office nagbantay usab sa kalimpyo sa mga sementeryo aron malikayan nga dunay mataptan og sakit sama sa dengue.
Nakig-alayon usab ang CCDRRMO sa Cebu City Transportation Office alang sa traffic plan ug dunay tawo nga i-assign ingon man ambulansiya nga makaresponde dayon kun dunay emerhensiya.
Giawhag ni Alcontin ang katawhan nga kun mahimo mosayo sila og bisita sa mga sam-ang ug dili makigdungan sa bagang duot sa mga tawo nga moadto sa menteryo atol gyud sa adlaw sa kalag-kalag.
Si Bonafacio Baguio, Caretaker sa Calamba Public Cemetery miingon ang una nilang gibuhat mao ang paglimpyo sa mga sam-ang subay sa awhag sa simbahan nga maoy nagdumala sa sam-ang.
Giandam usab nila ang dapit nga anha ipahimutang ang post sa PNP, Red Cross ug sa simbahan ug ang mga tanod usab sa barangay nakig-alayon sa kapulisan. (BANAT NEWS)
- Latest