Gikawat nga motor nasubay pinaagi sa CCTV

CEBU, Philippines — Nasikop sa follow-up operation sa kapolisan sa Presinto 5 sa Lapu-Lapu City Police Office (LLCPO) ang nangawat og motorsiklo dihang ang biktima nga silingan ang niila sa video footage nga nakuha sa kapolisan sa mga gilabyan niining establisemento sa Suba-Basbas, sa maong dakbayan.

Si Senior Police Officer One Reynante Mahusay sa Presinto 4 sa LLCPO niila sa ilang nadakpan sa Barangay Duljo, Dakbayan sa Sugbo alas 3 pasado sa niaging kadlawon nga mao si Alin Dave Geniralao Radaza, 28-anyos, taga Suba-Basbas.

Ang gikawat nga motorsiklo nga Suzuki ang gipanag-iya sa iyang silingan nga si Ricky Malingin Ochea kinsa dali nga nidangop sa pagsumbong sa kapolisan human nakamatikod sa kalit nga pagkawagtang gikan sa gi-parkingan niini sa ilang tugkaran.

Matud ni Mahusay nga ilang gisusi ang mga video footages sa pipila ka establisemento nga nahimutang sa maong dapit ug maoy ilang nasayran nga ang suspek maoy nagkuha sa motor ug giluwanan padulong sa Dakbayan sa Sugbo.

Dali nilang gihimo ang pakisusi ug ilang nasayran nga ang suspek kanunay kining magtambayan sa Duljo sa Dakbayan sa Sugbo uban sa pipila ka higala niini.

Sa follow-up operation nasayran nga ang motorsiklo padulong na unta iprenda.

Ang dinakpan nga nagtingkagol na karon sulod sa detention cell ang gikatakdang pasakaan og kaso nga pagpangarnap og motorsiklo. (BANAT NEWS)