Gibuwagan sa uyab naghikog

CEBU, Philippines — Patay na nga nadiskubrehan sa iyang amahan ang 18-anyos nga lalaki nga tinun-an sa high school kinsa gituohang naghikog tungod sa kaguol nga gibuwagan sa iyang uyab.

Nahitabo ang insidente sulod sa lawak sa ilang panimalay sa Purok Santan, Barangay Looc, Dakbayan sa Lapu-Lapu ug nadiskubrehan alas 2 pasado na sa niaging kadlawon.

Si Senior Police Officer 1 Luisito Ernie sa Homicide Section sa Lapu-Lapu City Police Office (LLCPO) niila sa namatay nga si Rendel Tampus, ulitawo nga nagpuyo sa maong dapit.

Matud ni Ernie nga nahigmata ang amahan nga si Reynaldo nga wala mapawong ang suga sa ground floor sa ilang panimalay hinungdan nga nagdali kini sa paggawas.

Maoy nasigpatan niini ang iyang anak nga si Rendel nga nagbitay na nga naghigot og pisi sa iyang liog ug wala na kini panimuot.

Dali nga gitangtang sa amahan ang pisi nga gihigot sa liog sa iyang anak ug gidala sa tambalanan apan gideklarar kini nga dead on arrival.

Si Ernie niingon nga walay napalgan nga suicide note sa sulod sa lawak apan sa Facebook account sa namatay maoy gi-post niini ang gibati niyang kaguol sa ilang panagbuwag og sa iyang uyab. (BANAT NEWS)