Du: Vidal aduna pay misyon

CEBU, Philippines — Duha ka mga arsobispo ang nibisita kagahapon kang Archbishop Emeritus Ricardo Cardinal Vidal nga nagpaalim sulod sa pribado nga tambalanan human kini na-confine sukad pa niadtong Miyerkules sa nilabay nga semana.

Ang mga niduaw kagahapon mao sila si Archbishop Angel Lagdameo, sa Jaro, Iloilo ug Archbishop John Du, sa Palo Leyte.

Si Rene Josef Bullecer, ang higala ni Vidal nga nahinabi sa Banat News miingon nga gituyo gayud ni Lagdameo pagbisita si Vidal ug nagpahigayon kini og Santos nga Misa ug pray over sulod sa Intensive Care Unit diin gibutang ang nagmasakitong prelate.

Sumala pa ni Bullecer, atol sa pag-pray over ni Lagdameo nibuka ang mga mata ni Vidal nga gituohan niyang tungod kay nakaila kini sa tingog sa higalang arsobispo.

Samtang nidalit og pag-ampo si Archbishop Du alang sa kaayohan ni Vidal kay nagtuo siyang aduna pay tahas ang 86 anyos nga cardinal.

Si Archbishop Jose Palma sa iyang bahin nitug-an nga nagpadayon ang monitoring kang Vidal, ug stable na ang kahimtang niini. (BANAT NEWS)