Supporters nilang Diamante ug Lagon nagka-tensyon
CEBU, Philippines — Giawhag ni Gob. Hilario Davide III ang mga supporters ni Tuburan Mayor Democrito Diamante ug ingon man sa kaatbang niini nga si Daphne Lagon nga magpabiling kalmado taliwala kini sa desisyon sa korte nga nipabor kang Lagon isip maoy mananaog sa 2016 mayoralty election sa Tuburan.
Ang Regional Trial Court sa Toledo midesisyon pabor kang Lagon nga maoy tinud-anay nga mananaog ug mimando kang Diamante nga bakantehan ang maong posisyon.
Sa desisyon ni Judge Hermes Montero sa RTC Branch 59 sa dakbayan sa Toledo niadtong Oktubre 10, base sa manual recount sa mga botos, gikan sa di momenus 11 ka presinto sa Tuburan nagpakita nga si Lagon nakadaog og 93 botos kang Diamante.
Si Lagon andam na moasumir sa pwesto apan si Diamante nagkanayon nga mo-contest gihapon siya sa ruling.
Si Davide nagtoo usab nga ang tinud-anay nga mananaog isip mayor sa lungsod mao si Diamante.
“Gamay ra man iyang labaw sa counting but he was proclaimed as winner and I believe in my heart he was the winner, he won the elections there,” matud sa gobernador kinsa miingon nga nakasabot usab siya sa protesta ni Lagon.
Si Diamante sa pakighinabi sa Banat News miingon nga walay problema sa iyang mga supporters nga giingong gibato sa mga supporters ni Lagon.
“Gara ila mga tawo, gibato ang mga motor sa ako supporters,” matud pa niya.
Samtang si Lagon sa iyang bahin miingon nga ang panawagan ni Davide angay nga adto ipuntariya sa mga supporters ni Diamante.
“Kalmado ang side namo, pabot ra mi sa maayong resulta para sa execution,” matud pang Lagon. (BANAT NEWS)
- Latest