Lakbayan nakapahuot sa trapiko

CEBU, Philippines — Nakamugna gyud og kahuot sa trapiko ang Lakbayan Visayas nga gisalmotan sa mga mag-uuma, mananagat ug uban pang caused-oriented groups gikan sa Kabisay-an nga nangabot dinhi sa dakbayan sa Sugbo.

Si Konsehal Dave Tumulak, Chairman sa Committee on Public Order and Safety nagkanayon nga ang hinungdan sa kahuot sa trapiko mao ang pag-usab sa plano sa mga misalmot kay ang unang nasabutan nga ang mga partisipante gikan sa Probinsiya sa Bohol, Negros ug Leyte mag-abot a dalan P. Del Rosario ug magdungan padulong sa Plaza Independencia.

Apan ang nahitabo matod pa ang mga grupo nagtapok sa nagkalain-laing lugar sama sa Mandaue ug Mambaling. Usa sa nakitang hinungdan mao ang deklarasyon sa Malacañang nga walay klase ug trabaho maong naglakaw ang grupo nga maoy hinungdan sa kahuot sa trapiko. Ang grupo nanawagan sa gobiyerno nga tumanon ang mga gisaad nga reporma sa agraryo ug pangisda, pagpagawas sa mga political prisoners ug pagkondenar sa mga pagpatay.

Kagahapon human sa ilang kalihukan hinay-hinay sila nga mibiya sa Plaza Independencia ug nangadto sa tagsa-tagsa ka mga billeting areas nila sama sa may Redemptorist, Archbishop covered court ug Plaza Independencia.

Upat ka adlaw  ang kalihukan ug mihangyo si Tumulak sa mga organizers nga dili itunong sa peak hours ang rallies aron di maghuot ang dalan ug dili maghimo og kasamok ug paghugaw-hugaw sa siyudad. Si CCPO director, Sr. Supt. Joel Doria miingon nga nag-deploy na sila og mga polis aron masiguro ang kalinaw sa maong kalihokan ug gigamit usab nila ang drone sa CCPO aron sila mabantayan. (BANAT NEWS)