‘Abtanan sa kaluoy’ sugdan na
Mismo ang mga benepisyaryo nga mga libud-suroy nga kabataan ang nitabang sa mga opisyal sa kagamhanan, simbahan, ug pribadong sector sa groundbreaking sa “Abtanan sa Kaluoy” nga maoy ilang activity center sa St. Joseph Parish sa Mabolo, Cebu City. — Aldo Nelbert Banaynal
CEBU, Philippines — Nagmaya ang mga bata nga kanhi libud-suroy human gipahigayon na kagahapon sa buntag ang groundbreaking sa katukuran sa Abtanan sa Kalooy.
Kini maoy bunga sa nilabay nga 51st International Eucharistic Congress sulod sa compound sa St. Joseph Parish sa Mabolo, Dakbayan sa Sugbo.
Usa ka 9-anyos nga bata ang nipadayag sa iyang dakong kalipay ug nagpasalamat sa Archdiocese of Cebu nga maoy mogasto sa katukuran sa Abtanan sa Kaluoy uban sa abag sa Conferencia Episcopal Italiana nga maoy mohatag sa budget alang sa pagpabarug niini.
Matud niya nga dugay na nga katuigan nga anaa siya sa dalan human nagkabuwag ang iyang mga ginikanan ug mapasalamaton siya nga giayudahan sila sa grupo nga Skids sa Barangay Subangdaku ug adunay nisagop kanila.
Aduna pa unyay liboan ka kabataan ang makabenepisyo sa katukuran sa Abtanan sa Kaluoy nga usa ka activity center nga mamahimong lugar alang sa mas maayong pag-atiman sa mga batang libud-suroy sa Metro Cebu.
Nangulo sa groundbreaking mao si Archbishop Jose Palma nga gisugdan sa usa ka Santos nga Misa dayon ang paglubong sa mga dokumento uban nila Bise Mayor Edgardo Labella, kaparian, representante sa kapulisan ug ubang sector.
Matud ni Palma nga grasya sa Dios ug instrumento ang Dilaab Foundation ni Fr. Carmelo Diola nga mao usab ang nitabang sa paghikay sa mga dokumento alang sa Abtanan sa Kaluoy.
Ang Abtanan sa Kaluoy usa ka lugar nga adunay mga kalihukan sa mga libud-suroy sama sa pagpakaon, pagpaeskwela ug uban pa nga panginahanglanon nga magtubag sa ilang kalisud samtang naglibud-suroy sila sa kadalanan.
Malaumon ang Arsobispo nga pinaagi niini daghan sa mga batang libud-suroy ang mahimo na unya mga propesyonal tungod kay aduna nay mohatag kanila og gugma ug pagkalinga.
Samtang si Labella malipayon ug mapasalamaton nga sa ilang barangay diin siya nagdako mahimutang ang Abtanan sa Kaluoy tungod kay dako kaayo kini og tabang ilabi na sa mga batang libud-suroy.
Dugang ni Labella nga tan-awon usab niya kung unsay matabang sa kagamhanan sa maong proyekto. (BANAT NEWS)
- Latest
