NGO nidonar og P600mil sa CCMC
CEBU, Philippines — Gidawat sa kadagkoan sa Cebu City Government nga gipangulohan ni Cebu City Mayor Tomas Osmeña ug Cebu City Councilor Mary Ann delos Santos isip chairman sa Cebu City Medical Center ang 10,000 Euros o P600 mil gikan sa Vriendschapsband Haarlemmermeer – Cebu (VHC) usa ka non-profit organization sa siyudad sa Haarlemmermeer sa nasud nga The Netherlands.
Ang maong donasyon gamiton para sa pagpanindot sa pasilidad sa pediatrics ward sa CCMC.
Gibutyag ni Cebu City Councilor Margot Osmeña nga usa siya sa nihangyo nga ang maong donasyon gamiton para sa Pediatrics Ward sa CCMC.
“Hopefully we’ll be able to have that real childrens’ ward,” dugang ni Margot human niini nakita ang situwasyon sa mga batang pasyente sa CCMC.
Ang mga delegado nga sila Jan Willem, Peter Janssen ug Stephan Elst ang mga representante sa usa ka non- profit organization nakatigom sa maong kantidad pinaagi sa pagkolekta og stuffed toys nga gipangulohan mismo sa ilang mayor ug ilahang gibaligya ug ingon man sa pagpahigayon og boxing clinic. “Haarlemmermeer has always been supportive” sigon ni Osmeña. Gibutyag usab ni Osmeña nga dili kini ang unang nahatag sa maong organisasyon.
Dugang pa ni Osmeña nga ang VHC usa sa pinakaaktibo nga sister city sa Sugbo tungod kay wala lang kini naglambigit sa gobiyerno apan apil na niini ang civil society ug uban pang NGO’s.
“We are very lucky to have a sister city” sigon ni Osmeña. Sa pagkakarun niabot na sa 25 katuig ang partnership sa Haarlemmermeer ug siyudad sa Sugbo. (BANAT NEWS)
- Latest
