P65M budget sa abang gikwestyon

CEBU, Philippines — Gikwestiyon ni Barug Team Rama Councilor Joel Garganera ang gi-propose sa Executive Department nga P65 million alang sa pag-abang og heavy equipment nga gamiton sa pagkolekta sa basura sa tuig 2018.

Si Garganera, kanhi Chairman sa Committee on Environment miingon ang maong proposed amount alang lang sa unom ka buwan.

 “With the current service provider, the contract was P55 million for 111 days that P65 million only represents half of the year. As usual they will pass a supplemental budget next year”, sigon ni Garganera.

Ang kasamtangang kontrata sa abang nga P55 million gitagana gikan sa buwan sa Oktubre hangtod na sa Disyembre karong tuiga. Base na sa purchase order, ang siyudad nagbayad og P700 matag oras sa kontraktor sa pagpadagan sa 11 ka dump trucks ug 10 ka compactor trucks.

Sigon ni Garganera, dili pa siya kasulti kun mobotar siya pabor o dili alang sa approval sa P65 million alang sa sunod tuig nga operasyon sanglit paminawon una niini ang habig sa Department of Public Services nga maoy nag-andam sa budget proposal alang sa leasing.

“We got to hear from DPS because with the current rental contract, P65 million is not enough for one year allocation”, sigon sa konsehal.

Una niini, si Garganera uban ang mga laing miyembro sa Barug Team Rama mikwestyon sa P700 rental fee per hour sa City Government sa kasamtangang service provider diin ilaha kining gihulagway nga mahal ra.

Sa iyang bahin, si Konsehal Eugenio Gabuya Jr., Chairman sa Public Services mitubag sa mga pangutana sa oposisyon.

 Gihimakak niini ang isyu sa mahal nga bayad dungan sa pagbutyag nga ang City Government nakadaginot sa leasing system sanglit responsibilidad na sa service provider ang pag-mentinar sa mga trucks aron naa kini kanunay sa maayong kondisyon.

 “Dili man siya mahal, naka-save gani ta kay libre ang driver, unya ang maintenance sa ilaha sad,” asoy pa ni Gabuya.

Kini midugang nga siya ug ang DPS hugot nga mag-monitor sa daily operation sa Pasajero Motors Corporation nga maoy service provider sa rental contract sa karon nga tuig nga nagkantidad og P55 milyones.

Wa pa hinoon makahatag si Gabuya og tukmang breakdown sa P65 million sanglit tan-awon pa niini ang budget details. - /IBM) (BANAT NEWS)