Rekisitos sa consultants gikwestiyon

CEBU, Philippines — Gikwestiyon sa mga konsehal sa Team Rama ang gihatag nga rekisitos sa Bids and Awards Committee for Infrastructure and Consulting Services labot sa pag-hire og mga consultants.

Kini human si Konsehal Joel Garganera nangayo og kopya sa gikinahanglan rekisitos sa consultancy services sa pangulo sa BAC Infrastructure and Consulting Services, Atty. Evangeline Abatayo.

Nakalatid sa suwat nga dunay petsa nga Septiyembre 28, 2017 ang tulo ka gikinahanglan nga mga rekisitos sa consultant.

Kini naglangkub sa letter request nga aprobado sa pangulo sa procuring offices sama ni Cebu City Mayor Tomas, Philippine Government Electronic Procurement System registration, resulta sa ilang Emotional Quotient (EQ) ug Intelligent Quotient (IQ) gikan sa mga accredited testing centers.

Human masayud sa maong mga rekisitos, nagduda si Garganera kun ang mga consultants sa Bando Osmeña Pundok Kauswagan (BOPK) nituman ba sa gipangayong requirements sa pagkuha og consultancy services.

Gihangyo usab niya ang Commission on Audit nga mosusi niini kay matud pa dili kini makiangayon sa ila kun sila motuman sa mga rekisitos apan ang ubang mga opisyal nga kaalyado sa mayor dili mosunod.

Si Konsehal Raymond Garcia niingon nga segurado siya nga ang ubang mga consultants wala motuman sa BAC requirements.

Ang konsehal niingon nga ang mayor “selective” sa pagpatuman sa balaud ug matud pa andam supakon sa mayor ang balaud alang sa mga kaalyado niini.

Gihulagway ni Konsehal Edu Rama si Osmeña nga “unfair” kay giingong gibaliwala ra niini ang requests sa mga konsehal nga dili niini kaalyado ug si Konsehal Pastor Alcover Jr. niasoy nga madinumtanon pa ang mayor kanila.

Apan si Osmeña sa iyang bahin niingon nga dili pa lang dugay siya nahibawo sa bag-ong requirements sa BAC ug gipaneguro niini nga iyang taktakon sa serbisyo ang consultants nga wala mohimo sa ilang trabaho.

Kahinumduman nga gibasura ni Osmeña ang hangyo ni Garganera, Garcia ug Alcover nga mo-hire og consultant dungan sa pagbutyag nga ang maong mga konsehal supak sa iya ilabi na sa pagpatuman sa Cebu Bus Rapid Transit project.

Gi-aprobahan sa mayor ang pagkuha og consultant nila ni Konsehal Jose Daluz III ug Rama kay nisuporta sila sa BRT project. - /GMR) (BANAT NEWS)