300 mil niduyog sa prosisyon

CEBU, Philippines — Gibanabanang moabot 200 ngadto sa 300 mil ka mga tawo ang nanambong sa Grand Marian Procession Fatima Experience Penitential Walk and Sacrifice niadtong Biyernes sa gabii sumala pa ni Archbishop Jose Palma sa Archdiocese of Cebu.

Ang prosisyon nanukad gikan sa Cebu Provincial Capitol ngadto na sa Basilica Minore del Sto. Niño Pilgrim Center diin gitapos sa usa ka  santos nga misa nga natapos pasado na sa alas 12 sa tungang gabii. Nilanat og upat ka oras kapin ang maong kalihukan.

Matud pa sa Arsobispo, bisan sa pagbunok sa ulan apan wala natarog ang pagtoo sa mga tawo nga mopadayon sa prosesyon nga iyang gihulagway pagpakita kini sa katawhan sa ilang dakong gugma ngadto sa  Birhen Maria.

Sumala pa ni Palma, angayan pasalamatan ang katawhan ug ang tanan nga mga tawo nga nagpaluyo alang sa kalampusan sa dakong panagtigum sa mga magtotoo.

Ang pangulo sa Commission on the Laity Fe Barino miangkon nga wala sila magdahom nga moabot og  ingon niadto kadaghan ang nanambong base sa pagbanabana sa Cebu City Disaster Risk Reduction Office tungod kay ang ilang gipaabot 30 mil ra ang mosalmot.

Ang spiritual director sa World Apostolate of Fatima Msgr. Ruben Labajo, mapasalamaton usab sa mga tigbalita nga nidala sa mensahe ngadto sa katawhan nga bisan og mag-uwan man ug magbaha padayonon gihapon ang prosesyon agi og sakripisyo sa mga deboto. Si Fr. Dennis Boltron, sa St. John the Baptish Parish, Giloctoc Barili maoy nangulo sa iyang 140 ka mga parokyano nikuot sa ilang kaugalingon nga bulsa aron sila makatambong dinhi sa siyudad.

Dugang pa ni Boltron, karon katapusan sa buwan aduna usab silay ilang kaugalingon  nga procession sa ilang parokya.

“Generally peaceful with no untoward incident reported,” mao usab kini paghulagway ni CCPO Director Joel Doria kabahin sa maong kalihokan. - /IBM) (BANAT NEWS)