Mandaue motabang sa pamilya sa giputlan sa ulo

CEBU, Philippines — Gitinguha sa kagamhanan sa Dakbayan sa Mandaue ang paghatag og pinansiyal nga hinabang sa pamilya sa babaye nga giputlan sa ulo sa mananagat niining kapuyo sa Tayud, Lungsod sa Consolacion.

Kini ang gipahibawo ni Jessie Perez, pangulo sa City Social Welfare and Services (CSWS) Office, human nasayri nga ang biktima nga si Lovely Jane Quiño, 25, taga Barangay Alang-Alang sa dakbayan.

Si Perez nga nahinabi sa mga tigbalita nipadayag nga ang iyang buhatan andam kanunay nga mohatag og ayuda sa mga molupyo sa dakbayan nga nanginahanglan og tabang ilabi na gyud sa mga sama sa pamilya sa biktima nga lisud ang kahimtang.

Hinuon wala pa matataw ni Perez ang kantidad sa salapi nga ihatag.

Nagbilin ang biktima og mga anak nga pulos gagmay pa nga giingong nakasaksi sa gihimo sa ilang amahan nga nagumon sa paggamit sa ilegal nga drugas nga si Dominic Pahugot.

Ang suspek kinsa giingong nagdala og sundang nisukol sa mga polis ug napusilan hinungdan sa kamatayon niini.

Si Cebu Archbishop Jose Palma niawhag sa katawhan sa pag-ampo alang sa asawa nga giputlan sa ulo.

Matud ni Palma nga kung pamalandungan dili gyud buhat sa tawo ang gihimo sa bana nga mopatay sa iyang asawa hinungdan nga kinahanglan gyud kining iampo lakip ang naghimo sa krimen kay wala kini sa iyang pangutok.

Gitug-an ni Palma nga adunay mga higayon nga ang mga nihimo og salaod wala nakasinati og pagsabot, gugma, suporta sa iyang pamilya ug kahigalaan, hinungdan nga kinahanglan sila og pag-ampo ug mga buhat sa kalooy ug dili ikondenar. (BANAT NEWS)