Tokhang out, pokemon padayon

CEBU, Philippines — Magpadayon gihapon ang Oplan Pokemon sa Cebu City Police Office bisan og gipahunong na ang Oplan Tokhang ug Oplan Double Barrel-Reloaded sa kapolisan human gimando ni Pres. Duterte nga ang Philippine Drug Enforcement  Agency na ang manguna sa kampanya kontra ilegal nga drugas.

Ang direktor sa Cebu City Police Office nga si Senior Supt. Joel Doria miingon nga mas tutukan nila sa ilang Oplan Pokemon ang pagpaubos sa kriminalidad sa dakbayan.

Kini mao ang aktibo gihapong operasyon batok sa tanang matang sa krimen ilabi na sa ilegal nga sugal  ug ang pag-implimentar sa mga ordinansa sa siyudad.

Ang Oplan Pokemon maoy gigamit sa CCPO sa pag-roundup sa mga gidudahang kriminal ug mga nagpabadlong sa katilingban pinaagi sa lapad nga saturation drives nga himuon sa tanang police stations ug special units.

Sagad sa ilang mga operasyon miresulta sa pagkasakmit sa minilyon ka pesos nga kantidad sa drugas, mga armas, gambling machines, nakadakop og mga tawong adunay mga warrants of arrest ug uban pa.

Tungod sa mando sa pangulo, nipadala og direktiba si Chief PNP Ronald ‘Bato’ dela Rosa sa tanang mga rehiyon nga buhian ang tanang mga programa sa pakigbatok sa ilegal nga drugas ug tutokan ang ubang anti-criminality campaign.

Tungod usab niini, gibungkag na sa PRO-7 ang drug enforcement units niini sa mga police stations.

Ang hepe sa Regional Intelligence Division sa Police Regional Office 7 nga si Senior Supt. Jonathan nagkanayon Cabal nga dako na sab hinuon ang natampo sa PNP pagpamenus sa gidaghanon sa mga durugista sa Kabisay-an.

Apan tungod niining mga nahitabo nga mga binuang sa ubang mga polis didto sa Metro Manila sa paghimo og anti-illegal drugs operations napagan ang kapolisan dinhi sa Central Visayas.

Siya mibutyag nga si PRO-7 director Chief Supt. Jose Mario Espino miingon nga magpadayon sila pagtabang sa PDEA sa mga operasyon niini.

Ang tigpamaba sa Cebu Provincial Police Office nga si Superintendent Virgilio Bayon-on mipasalig usab nga dili maapektohan ang mga nitahan gawas lang niadtong wala pa kay basin mogara hinuon.

Ang PDEA-7 aduna lamang 95 ka mga sakop nga molihok sa Sugbo, Bohol, Siquijor ug Negros Oriental, apan 49 lamang niini ang mga operatiba o kadtong aktuwal nga maghimo sa operasyon.

Ang Central Visayas adunay 6 milyones nga populasyon. Matud pang Cabal dako og matabang ang mga force multipliers niini. Gipahibalo usab sa Officer-in-Charge sa PDEA-7 nga si Atty. Ana Lynn Hernandez-Nob nga aduna na silay bag-ong director nga mao si Director Emerson Margate.

Si Margate mao ang direktor sa PDEA Region 5 nga mohulip sa pwesto ni kanhi Director Yogi Felimon Ruiz kinsa gibalhin na karon sa Bureau of Customs subay sa gusto ni Isidro Lapeña, si Ruiz mao na karoy BOC Commissioner.

Samtang wala pa makapili ang maong ahensya sa ihulip kang Ruiz, si Nob ang mibarog isip OIC sa maong ahensya. (BANAT NEWS)