Tanang polis sa Talisay hayan relibuhan

CEBU, Philippines — Hutdon sa pagrelibo sa Cebu Provincial Police Office ang kapolisan sa Dakbayan sa Talisay kun dili nila mapaubos ang crime incidents sa ilang lugar.

Matud ni CPPO Deputy Provincial Director for Operation, Supt. Ryan Manongdo, nga ipaubos sa training ang mga polis kun dili nila malimpyuhan ang dakbayan sulod lang sa duha ka semana sugod kagahapon.

Sigun pa niya nga bisan giilisan na ang ilang hepe ug nipahigayon sila og pipila ka training ug seminar alang sa mga polis, nagpadayon gihapon og saka ang ilang crime volume.

“Talisay ang greatest contributor ng crime sa province,” matud ni Manongdo.

Nanghinaut ang maong opisyal nga dili unta mapareho ang estasyunan sa Talisay sa nahitabo sa kapolisan sa Caloocan City diin girelibuhan ang tibuok pwersa.

Usa ka polis sa Talisay nga si SPO4 Rolando Andales ang una na nga gibutang sa Provincial Holding Account Unit human gituohang nangilkil og kwarta.

Ang hepe sa kapolisan sa Dakbayan sa Talisay, Supt. Jason Villamater, niingon nga dili mga badlungon ang mga polis ubos niya.

 Sigun pa niya nga dako ang sakop sa ilang estasyon diin taas ang populasyon hinungdan nga daghan sab ang crime volume niini. Anaa ra sa 72 kabuok ang polis sa dakbayan mao nga nanghinaut ang hepe nga mapun-an sila. (BANAT NEWS)