Task force kontra traffic tukoron ni Gullas

CEBU, Philippines — Naglaraw si Talisay City Mayor Eduardo Gullas sa Siyudad sa Talisay nga tukuron ang task force alang sa pagsulbad sa grabeng trapik sa iyang dakbayan.

Kini human iyang nakita nga dili lang kini masulbad sa usa o duha ka tawo  lang. Matud pa ni Gullas nga iyang himuon nga grupo nga isog ug makamao sa pagpatuman sa estriktong lagda sa trapiko aron ang mga motorista motamod sa balaud.

Ang dakbayan aduna’y mga traffic enforcers sa City of Talisay-Traffic Operation Development Authority (CT-TODA) pinanguluhan ni Almond Dela Peña.

Apan gamay ra kaayo ang ilang mga sakop nga makaisyu og Temporary Operator’s Permit (TOP) sa mga malapasong motorista. Mas dako ang multa sa TOP itandi sa citation tickets.

 “I will craft a team as soon as possible. Unya ang head kanang ka antigo gyud nga mo assert ba,” nagkanayon si Gullas.

Dugang pa niya nga dili lang sa Tabunok nga trapik ang iyang gipasabot nga sulbaron kun di ang tibuok barangay sa Talisay.

Ang suliran sa trapiko taud-taud na sab nga giyangungo sa mga motorista. (BANAT NEWS)