Gireklamo sa paryente, armado gidakop
CEBU, Philippines — Lalaking armado ang gidakop sa kapolisan sa Siyudad sa Talisay human gireklamo sa iyang paryente gumikan sa pagdala-dala og armas sa ilang lugar sa Sitio Libo, Barangay Mohon niadtong Lunes sa gabii.
Ang suspek nailhan nga si Baltazar Manyao, 41, ulitawo nga nagpuyo sa maong lugar.
Matud ni SPO1 Erwin Carbonquilo sa Talisay City Police Station nga ang paryente ni Manyao maoy nitawag kanila ug nagpatabang aron dakpon ang suspek.
Girespondehan sa mga awtoridad ug nakwelyuhan gyud si Manyao nga nagdala og .38 revolver nga aduna’y lima ka bala. Wala’y napakitang dokumento sa iyang armas ang suspek hinungdan nga gidala sa Talisay City Police Station.
Matud ni Carbonquilo nga aduna na’y bangi ang suspek ug ang iyang mga paryente hinungdan nga sa kabalaka sa nisumbong sa kapolisan ila na lang gipahipos ang suspek ug pasakaan og kaso karong adlawa. (BANAT NEWS)
- Latest
- Trending