Detenado napusilan sa tanod patay

CEBU, Philippines — Usa ka dinakpan nga gitanggong sa detention cell sa Ermita barangay hall ang namatay dihang giingong gipusil sa barangay tanod kagahapon sa kaadlawon.

Ang biktima giila nga si Lendon Abadinas, 36, residente sa Barangay Poblacion Pardo. Samtang ang gitumbok nga nakapusil kaniya mao ang tanod nga si Junnel Sanchez ug kakunsabo ang laing tanod nga si Jerome Miral. Sumala pa sa imbestigador sa Homicide Section sa Cebu City Police Office nga si SPO1 Winston Ybañez ang biktima gidakop ni Miral human kini giingong mihana kaniya og bunal sa gibitbit nga tubo diha sa may Freedom Park niadtong Lunes sa gabii.

Giangkon ni Miral nga iyang gisumbag sa tiyan si Abadinas tungod kay misukol kini kaniya.Siya nangrason nga wala niya dayon dad-a sa police station si Abadinas kay gikapoy na siya ug nakadesider nga mopauli. Nakurat na lang siya nga napusilan na diay si Abadinas.

Sumala pa sa kapolisan, duha ka mga saksi ang nitug-an nga gipukaw si Abadinas sa laing usa ka barangay tanod ug giposasan  ug gibutangan og tape ang baba niini alas 12:30 Martes sa kaadlawon ug gikulata sa sulod sa detention cell dayon giguyod pagawas sa prisohan. Sunod nilang nadunggan ang usa ka buto sa armas.

Sumala pa sa direktor sa CCPO nga si Senior Supt. Joel Doria bisan ang hepe sa Carbon Police Station nga si Chief Inspector Jacinto Mandal nakadungog sa buto sa pusil ug dali silang nigawas sa police station  aron pagsusi apan ilang nasugatan si Abadinas nga nagkadugo sa liog, nakaposas pa ang mga kamot niini sa likod ug aduna pay tape sa baba.

“Nung tinanong nila kung sino yung bumaril, sabi ‘yung tanod daw,” si Doria miingon.

Sa bersyon pa ni Sanchez, miangkon kini nga usa siya sa midakop kang Abadinas kay nangawat kini sa Freedom Park. Matud niya dihang ilaha na unta kining ibalhin sa police station aksidente kining napusilan.

“Wa koy intensyon nga pusilon siya. Ang akong shorts loaded man gud kaayo niya paglinayogay namo natagak (ang pusil). Pagbuto (sa pusil) wa ko kahibaw kung naigo ba to o wala kay nidagan man to,” si Sanchez miingon.

Gawas kang Abadinas, aduna pay laing gipangtanggong sa detention cell sa barangay gumikan sa lain-laing kaso ug sila nangreklamo karon kay gawas nga wala sila i-turnover ngadto sa kapolisan wala sab sila pakan-a sukad pa niadtong Sabado.

Apan gihimakak kini ni Kapitan Felicisimo Rupinta kay matud niya pinakaon ang ilang mga dinakpan. Apan si Doria miingon nga illegal detention ang gibuhat sa maong mga tanod tungod kay citizens’ arrest lang ang gahom sa barangay ug bugtong ang kapolisan lang ang gitahasang motanggong ug mopasaka og kaso sa mga dinakpan.

“Dapat immediately ‘tinurn over’ kaagad sa pulis. Pagkalumagpas na sa grace period, illegal detention na ‘yun,” matud pa sa maong direktor. Kasong murder ang ipasaka nga kaso sa duha, si Ybañez miingon.

Si Sanchez mitahan kang Rupinta human siya gipatawag sa kapitan tungod sa nahitabo kang Abadinas.

Dihang gipangutana kini kun nganong nagdala siya og armas si Sanchez miingon nga depensa kini tungod sa ilang trabaho apan si Rupinta miklaro nga wala niya tugoti iyang mga tanod nga magdala og armas.

Si Konsehal Dave Tumulak, Chairman sa Committee on Public Order and Safety  miingon nga gidili gyud sa mga tanod nga magdala og armas kay  ang ilang trabaho mao ang pag-report, pagkuha og impormasyon nga makatabang sa mga polis ug kun dunay operasyon ang mga law enforcement agencies moabag sila kanila.

Sa iyang bahin, si Cebu City Mayor Tomas Osmeña miingon nga kun tugutan sa balaod pabor siya nga magdala og armas ang mga tanod.

Tungod sa kalambigitan sa tanod, mopahigayon og Motu Propio Investigation ang Commission on Human Rights 7 sa maong hitabo.

Matud pa ni Leo Villarino, Chief Investigator sa CHR7 walay pagtugot ang mga barangay tanod nga mopriso sa ilang mga dinakpan sa barangay tungod kay dili sila sakop sa mga law enforcement agency ug kinahanglan nila kining dad-on dayon sa police stations.

Giawhag usab ni Villarino, ang pamilya sa namatay nga mopatim-aw sa ilang buhatan ug makig-alayon sa buhaton nila nga imbestigasyon. (BANAT NEWS)