Mga karsada siradoan atol sa Grand Marian Procession
CEBU, Philippines — Gikatakdang siradoan ang dalan sa walang bahin sa Osmeña Boulevard lakip na ang wala ug tuong bahin sa downtown area paingon sa Basilica Minore Del Santo Niño karong Oktubre 13, 2017 adlaw’ng Biyernes sugod sa alas 7:30 sa gabii hangtud sa alas 12 sa tungang gabii alang sa Grand Marian Procession.
Ang procession magsugod kini sa alas 9:00 sa gabii ug manukad sa Cebu Provincial Capitol ground subay sa kadalanan sa Osmeña Boulevard hangtud sa downtown ug taposon sa usa ka Santos nga Misa diha sa Basilica nga pangulohan ni Cebu Archbishop Jose Palma.
Ang hepe sa Cebu City Police Operations Superintendent David Señor mipahibawo sa publiko nga sa maong adlaw nga gikatakda dili paagian ang Osmeña Boulevard sa pampubliko ug pribadong mga sakyanan nga mopaingon sa downtown area sugod sa alas 7:00 sa gabii ug ang mga sakyanan nga mopaingon sa uptown area dili na usab paagion sugod sa alas 9:00 sa gabii.
Sa nahisgutang adlaw ang tibuok dalan sa Colon siradohon tungod kay anha mosubay ang procession.
Matud ni Señor nga 172 ka polis ang ipakatap sa nagkalain-laing bahin sa kadalanan nga maagian sa procession ilabi na diha sa Basilica.
Subay niini, si Harold Alcotin, Disaster Risk Reduction and Management Officer mibutyag nga uban sa Philippine National Red Cross ug Emergency Rescue Unit Foundation (ERUF) aduna sila’y ambulansiya ug mga fire truck nga giandam alang sa maong kalihukan. Ang maong kalihukan subay kini sa pag-anunsiyo ni Pope Francis karon nga tuig isip "Jubilee Year of Fatima" sa pagsaulog sa ika-100 tuig sa aparisyon ni Birhen Maria sa Portugal kaniadtong 1917. Ang Grand Marian Procession dungan kini sa ipahigayon nga Gabii sa Kabilin. (BANAT NEWS)
- Latest
