Bunok sa uwan dili makapugong sa Grand Marian Procession

CEBU, Philippines — Bisan magbunok ang uwan dili kini makapugong sa pagpahigayon sa Grand Marian Procession sa Archdiocese of Cebu karong Oktubre 13, sa alas 9:00 sa gabii nga manukad diha sa Cebu Provincial Capitol ug tak-opan sa usa ka Santos nga Misa nga pagadumalaon ni Archbishop Jose Palma diha sa Pilgrim Center sa Basilica Minore del Santo Niño.

Ang Grand Marian Procession gikan sa Capitol Ground mopaingon sa Osmeña boulevard hangtud sa dalan Colon dayon ngadto sa pilgrim center diin bisan mobunok pa ang kusog nga uwan ipadayon gihapon kini isip pagsakripisyo ilabi na sa mga panghitabo nga kagubot sa nasud.

Sukad niadtong Nobiyembre sa milabay’ng tuig hangtud sunod bulan gideklara ni Pope Francis nga Jubilee Year of Fatima, subay sa kasaulogan sa 100 ka tuig human nagpakita ang Mahal nga Birhen sa tulo ka mga bata sa Cova da Iria sa Fatima Portugal niadtong Mayo 13 ngadto sa Oktubre 13, 1917.

Si Archbishop Palma, nitahas sa commission on the laity sa pagpahigayon sa labing unang dakong kalihukan sa pagsaulog sa ika-100 nga anibersaryo sa pagpakita sa mahal nga birhen sa tulo ka bata nga sila si Lucia, Francisco ug Jacinto didto sa nasud sa Portugal.

Matud pa ni Monsignor Ruben Labajo, Archdiocesan Spiritual Director, niadto pang Mayo 13 gisugdan na sa mga simbahang Katoliko ang matag buwan nga kalihukan pahinungod sa Mahal nga Birhen ug ang grand procession natumong usab sa pagsaulog sa simbahang Katoliko sa bulan sa pagrosaryo. Gitug-an ni Labajo nga ang Grand Marian Procession usa ka penitential walk alang sa mga problema ug kasamok nga giatubang sa nasud ug pinaagi niini ilang gipanghinaot nga ang kalinaw maoy mopatigbabaw, samtang kadtong anaa na sa mga lagyo nga lugar mahimo ra usab sila nga mohimo og kalihukan pahinungod sa Mahal nga Birhen.

Samtang ang pangulo sa commission on the laity Fe Barino, nitug-an nga 17 ka karo sa Mahal nga Birhen  nga adunay lain-laing titulo nga gisakay og karosa nga gikan sa nagkalain-laing parokya ang i-apil sa procession samtang kadtong nagtinguhang modala sa ilang mga imahen sa mahal nga birhen mahimo  kining kugoson ug dili isakay og laing karosa.

Giawhag ni Barino, ang mga Sugbuanon sa Metro Cebu ug sa silingang mga parokya sa probinsiya nga duol pa sa dakbayan sa Sugbo nga moapil sa maong kalihukan ug magdala og mga kandila ug panyo nga puti nga adunay imahen sa mahal nga birhen nga mahimong mapalit sa mga parokya.

Gipahibalo usab ni Barino nga ang tibuok rota sa procession adunay mga sound system nga naka- tune in sa Power Fm 89.1 nga maoy magdala sa nagrosaryo ug mga pagbasa samtang ang Santos nga Misa madungog sa DyRF 1215 alang sa mga masakiton nga dili na makahimo sa pagtambong sa maong kalihukan. - /BDB) (BANAT NEWS)