P6 Milyones shabu nasakmit

CEBU, Philippines — Kapin sa P6 Milyones nga balor sa ginadili nga drugas ang nasakmit sa kapulisan sa sunod-sunod nga buy-bust operation sa Barangay Jugan, Pulpogan ug Tayud, lungsod sa Consolacion niadtong Huwebes sa gabii.

Ang target sa unang operasyon giila nga si Dante Pilapil, 26, residente sa maong lugar. Nasakmit gikan ni Pilapil ang sobra sa tunga sa kilo nga ginadiling drugas nga gibana-banang mokabat sa P6,289, 400 ang kantidad.

Lakip sa nasakmit sa maong suspetsado mao ang kalibre .38 nga pusil nga adunay mga bala.

Matud pa ni Police Superintendent Mina Domingo, hepe sa kapulisan sa Consolacion nga nisuway og ikyas ang suspetsado kauban ang iyang kunsabo nga nailang si Christopher Cabajug, 45.

Apan nababoy sila sulod sa usa ka balay hinungdan sa ilang pagkasikop ug naapil pa ang laing upat ka personalidad nga nasakpang nanuyop nga silang John Cabajug, 24, Kayze Ryan Oncenes, 21; Oliver Tubilan, 25; ug Nicanor Jimenez, 45, pulos mga taga Liloan. Si Christopher nakuhaan usab og lima ka gagmay’ng pakete sa shabu.

Atol sa pagkasikop ni Pilapil, gi-served usab ang warrant of arrest gikan ni Judge Mory Nueva sa  Regional Trial Court Branch 13 sa Cebu City tungod sa kaso sa ilegal nga drugas tungod sa pagronda kaniya niadtong Marso apan nakaikyas kini.

Sa laing operasyon sa Barangay Pulpogan ug Tayud, nasikop sa kapulisan sila si Daniel Diez, 35; Ritche Pilapil, 38 ; Ritchie Iwayan, 30; ug Vanessa Maglasang, 38. Si Diez ug Ritchie Pilapil maoy mga target sa duha ka nagsunod nga operasyon.

Si Diez nakuhaan og ginadili nga drugas nga mobalor sa P1, 770, samtang si Ritchie Pilapil nasakmitan og P2, 124 nga gituohang shabu.

Dugang pa ni Domingo nga ang drugas maoy usa sa mga ugat sa krimen sama sa patay ug kawat sa lungsod. - /IBM) (BANAT NEWS)