Medicinal marijuana ok apan...

CEBU, Philippines — Human aprobahi sa House of Representative ang paggamit og marijuana isip tambal sa usa ka matang sa sakit ang Philippine Drug Enforcement Agency Region 7 mipasidaan nga dakpon gihapon nila kadtong mogamit niini nga walay reseta o preskripsyon sa doktor.

Si Investigation Agent 1 ug team leader sa PDEA-7 Earl Rallos mitataw nga kun nakita sa mga eksperto nga adunay maayo nga epekto sa panglawas sa pasyente angayan lang respetohon ang desisyon sa House of Representatives.

Matud pa nga kadtong mga tiggamitan og marijuana nga walay gipamating sakit pangdakpon sanglit nakalapas na sila sa balaod. Ang

paggamit ug paghupot og bisan unsang mga ilegal nga drugas sama sa shabu ug marijuana may silot sa balaod.

Giaprobahan sa committee on health niadtong Lunes ang House Bill 180 o ang Philippine Compassionate Medical Cannabis Act nga

himuong legal ang paggamit niini alang sa pagpanambal.

Nasayran nga sa Republic Act 9165 o ang Comprehensive Dangerous Drug Act of 2002 nag-ingon nga ilegal ang paggamit og

marijuana o ang cannabis sativa, apan tuod man napamatud-an sa mga siyentipiko nga makatabang kini sa pag-alibyo sa mga simtomas sa

cancer, multiple sclerosis ug uban pa. Matud pa ni Rallos nga sama ra sab sa Nubain ang marijuana diin makatabang sab kini sa pag-alibyo sa

mga sakit sa panglawas apan kun walay preskripsyon sa doktor, ilegal na ang paggamit niini.

Samtang nasikop sa checkpoint sa kapolisan sa Lungsod sa Tabuelan ang duha ka tinun-an sa kolehiyo nga nakuhaan og pinaketeng

marijuana niadtong miaging Martes sa buntag.

Ang hepe sa Tabuelan Police Station Senior Inspector Emmanuel Rabaya miila sa duha ka mga tinun-an nga mao sila si Ervin John

Laput, 20, ug Anthony Benzulan, 21.

Matud pa ni Rabaya misuway pag-eskapo ang duha pagkakita sa checkpoint apan ilang napugngan ug sa pagsusi sa ilang bulsa aduna

silay mga pinaugang dahon sa marijuana.

Ang duha nangangkon nga ang gidala nilang marijuana gamiton sa medical laboratory sa kauban nilang mga tinun-an .

Sa laing bahin, duha ka mga minor de edad nga taga Dakbayan sa Toledo ang nasikop sa mga sakop sa City of Naga Police Station

human sa gipahigayon nga check point sa may barangay South Poblacion.

Ang nasikop nag-edad pa og 17-anyos ug 16-anyos pulos taga Barangay Maingit, dakbayan sa Toledo.

Matud pa ni Police Supt. Gregorio Galsim, hepe sa City of Naga Police Station gipara ang duha nga nagmotor apan sa dihang

gipangayoan og lisensiya wala silay napakita.

Sa dihang gimandoan ang duha pagpagawas sa ilang bulsa didto nakit-an ang tulo ka gagmay nga plastic nga gituohang shabu. (BANAT NEWS)