Lapu-lapu may bag-ong konsehal
CEBU, Philippines — Opisyal na nga nilingkod sa katungdanan ang bag-ong gitudlo nga konsehal sa Dakbayan sa Lapu-Lapu nga si Konsehal Jeannify Tan-Dungog hulip kang anhing Damian Gomez Jr. kinsa namatay niadtong Marso 2.
Si Dungog nanumpa niadtong Lunes atubangan ni Lapu-Lapu City Regional Trial Court Branch 53 Presiding Judge Anna Marie Militante.
Gisunod dayon niya ang courtesy call kang Mayor Paz Radaza kinsa iya gihatagan sa kopya sa iyang appointment ug oath of office.
Si Dungog moapil sa unang higayon sa sesyon sa konseho sa siyudad karong hapon.
“I am deeply honored to be given the mandate by no less than our President to carry out, within the City, his policy against graft and corruption and the proliferation of illegal drugs,” matud ni Dungog.
Si Presidente Rodrigo Duterte ang nipirma sa appointment ni Dungog niadtong Septiyember 4, 2017.
Gipasalig ni Dungog sa kasamtangang administrasyon ni Radaza nga andam siya mosuporta sa mga programa nga makaayo sa taga Opon.
“My conscience and my knowledge of the law shall be my only guide in this new journey,” dugang ni Dungog.
Si Dungog usa ka abogada ug asawa ni Atty. Ferdinand Dungog kinsa nilansar sa pagkakonsehal sa niaging eleksiyon ubos sa Partido Demokratiko Pilipino-Lakas ng Bayan (PDP-Laban) nga gipangulohan ni Duterte isip party chairman. (BANAT NEWS)
- Latest
