Kamatayon sa managkapuyo gisubay sa kapolisan

CEBU, Philippines — Giklaro sa hepe sa Investigation, Detection and Management Branch, Supt. Ryan Devaras, nga walay laing tawo nga nalambigit sa kamatayon sa managkapuyo kinsa napalgang patay sulod sa giabangang balay sa Maracas, Lahug, Dakbayan sa Sugbo niadtong Domingo sa hapon.

Kini tungod kay sirado ang maong balay ug ang lock anaa sa sulod.

Napalgang patay ug nabaho na ang duha dihang pugsanong giabli ang pultahan niini ug gisulod sa taga Homicide Section sa Cebu City Police Office nga gipangulohan sa imbestigador nga si PO3 Jeffroy Gutual ang panimalay.

Ang duha giila nga sila si Pruana Lombrado Apoli, 48, ug si Jerson Lawas, 29-anyos.

Asoy sa imbestigador nga wala pay usa ka tuig ang relasyon sa duha ug upat pa sila ka buwan nga nagtipon sa maong lugar.

Matud ni Gutual nga nagkatibulaag na ang pipila ka gamit sa maong balay timaan nga adunay nilayogay sa wala pa sila namatay.

Wala pa sab nasubay kung duna bay nangawala sa mga butang.

Kasamtangan pang gipaubos og paraffin test ang mga kamot sa duha aron masuta kun kinsa gyud ang nagpaboto niini human nasayri nga gipanag-iya ni Apoli ang kalibre .22 nga nakit-an sa mga kamot ni Lawas. Gitan-aw sab kun kinsa ang nanag-iya sa mga fingerprint sa kitchen knife nga napalgan kilid sa patay’ng lawas ni Apoli diin gidudahan sa imbestigador nga maoy gigamit sa pagpatay sa babaye. (BANAT NEWS)