Daanbantayan nagtinguha mahimong drug-free

CEBU, Philippines — Ikatulong hugna sa pirma kontra druga, gipahigayon sa Lungsod sa Daanbantayan niadtong Sabado.

Niabot sa 319 ka tawo nga nalambigit sa ilegal nga drugas gikan sa lima ka barangay sa maong lungsod ang nitahan sa ilang kaugalingon.

Gipangulohan ang maong kalihukan ni Police Senior Inspector Irish Delim sa Daanbantayan Police Station ug gisaksihan kini ni PSupt. Ryan Manongdo ang Deputy Provincial Director for Operations sa Cebu Provincial Police Office.

Ni-administer sa pagpanumpa sa mga drug surrenderee mao si Vice Mayor Gilbert Arrabis Jr. diin nipasalig ang mga nanumpa nga motabang sila sa programa sa kagamhanan labot sa gubat batok sa ilegal nga drugas.

Matud pa ni Mayor Vicente Loot kinsa nihatag sa iyang mensahe ngadto sa mga nitahan, nga ni-surrender sila dili tungod kay gipugos sila kon dili gikan gayud sa ilang kasing-kasing.

Dugang pa ni Loot nga ilang gitutukan karon ang kausaban sa hingpit sa mga drug surrenderee ug kalungtaran sa panginabuhian niini.

Dos milyones pesos ang gitagana sa mayor alang sa ilang Community Base Treatment alang sa mga nitahan.

Sa pagkakaron, aduna nay unom ka barangay sa Daanbantayan ang gideklarar nga drug free ug adunay 14 ang gipaubos na sa validation aron madeklarar usab nga drug free.

Gitug-an ni Loot nga ilang tinguha nga sa dili pa matapos ang tuig, mahimo na silang drug free nga lungsod.

Human sa maong kalihukan ang mga nitahan, nitambong sa mga sesyon sa upat ka mga pastor gikan sa NACPHIL pinaagi ni Pastor Reynaldo Compuesto nga sakop sa PNP Municipal Advisory Council. (BANAT NEWS)