14-anyos nalumos atol sa family day
CEBU, Philippines — Gideklarang patay na dihang naabot sa Talisay City District Hospital ang 14 -anyos nga lalaki human kini nalumos sa swimming pool sa Villa Gallego Beach Resort sa may Barangay Biasong sa Dakbayan sa Talisay niadtong Sabado sa alas 12:45 sa udto.
Ang namatay nailhan nga si Briar Bacangoy taga Barangay Bulacao, Siyudad sa Sugbo. Asoy sa amahan niini nga si Silvino Sangalang ngadto sa kapolisan nga nitambong sila og family day ug nagkalingaw sa pagpangaligo sa swimming pool sa dapit.
Apan wala nila mabantayi ang iyang anak kay siya nagtuo nga makamao kining molangoy. Diha na sila nataranta sa dihang ilang namatikdan nga wala na nitungha ang iyang anak gikan sa tubig.
Dali nila kining gitabang ug gidala sa tambalanan apan wala na magsilbi ang pagtabang sa bata. (BANAT NEWS)
- Latest