Mekaniko naghikog; batan-on napalgang nagbitay

CEBU, Philippines — Patay ang usa ka mekaniko dihang nagkutlo kini sa iyang kinabuhi human sa ilang lalis tali sa iyang asawa sa may Sambag, Brgy. San Vicente, Lungsod sa  Liloan sayo sa buntag kagahapon.

Ang naghikog mao si Leonides Quintenita, 32-anyos, minyo, trabahante sa usa ka auto parts.

Matud ni PSupt. Melbert Glade Esguerra, hepe sa Liloan Police Station, nidangop sa ilang buhatan ang asawa sa namatay nga si Ronna Maharlie Quintenita aron personal nga isumbong ang nahitabo sa iyang bana nga nagkutlo sa iyang kinabuhi sa sulod sa ilang panimalay.

Sumala ni Esguerra, dali nga niresponde ang iyang mga sakop sa panimalay sa mga Quintenita ug didto ilang nakita ang lawas ni Leonides nga nagbitay.

Base sa ilang initial investigation, nag-away ang magtiayon niadtong niaging gabii sa wala pa kini maghikog.

Giingong gibutyag sab sa asawa nga nagtinguha na kaniadto si Leonides nga magpakamatay ug kagahapon nadayonan kini.

Ang biktima gidala sa Liloan Municipal Health Office apan gideklarar nga dead on arrival.

Samtang nagpakisusi karon ang Bogo City Police Station sa pag-ila sa patay’ng lawas sa usa ka lalaki nga napalgan pasado alas dos sa hapon niadtong Sabado sa bukirang bahin sa Barangay Pandan, Dakbayan sa Bogo.

Matud ni PO2 Efdel Neiz sa Bogo Police Station nga ang maong patay’ng lawas giingong padung na sa pagkadugta ug kini nagbitay sa kahoy gamit ang pisi.

Dugang sa polis nga wala’y nakaila sa maong patay’ng lawas nga napalgan sa mga lumolupyo sa maong lugar hinungdan nga dako ang ilang pagtuo nga wala kini magpuyo sa maong lugar.

Nagtuo ang kapolisan nga pipila ka adlaw na nga namatay ang maong lalaki kay base sa kahimtang sa lawas niini, padung na kini sa pagkadugta.

Gipahibawo ni PO2 Niez nga temporaryong gipahimutang ang maong patay’ng lawas sa usa ka punerarya ug ilang gipaabot ang mga kabanay niini. (BANAT NEWS)