Mayor Tom buot maimplementar ang 15 ka skyway ug underpass

CEBU, Philippines — Si Mayor Tomas Osmeña nagtinguha sa pagpadayon sa implementasyon sa 15 ka skyway ug underpass aron matubag ang nagkagrabeng problema sa kahuot sa trapiko sa siyudad sa Sugbo.

Matud ni Osmeña nga gipahibawo siya nga ang Department of Public Works and Highways (DPWH) nagtrabaho na alang sa finalization sa full detailed engineering design sa 25 ka skyway, flyover ug underpass nga i-implementar sa dakbayan sa Sugbo ug Mandaue. Giingong sa 25 ka gidaghanon sa skyway, flyover ug underpass, 15 ka skyway, flyover ug underpass ang i-construct sa mga barangay sa Cebu City lakip niini ang Mambaling ug Lahug.

Si Osmeña nagkanayon nga dunay lima ka skyways nga magkonektar sa Fuente Osmeña paingon sa Serging Osmeña Boulevard ug pipila ka dalan sa siyudad.

Usa ka underpass ang tukuron sa Mambaling access road nga magkonektar sa South Coastal Road ug laing flyover ang i-construct duol sa usa ka mall sa Barangay Lahug.

Dunay mga report kaniadto nga 20 ka flyover ug underpass nga nagkantidad og P7 bilyones ang i-implementar sa Cebu City ug Mandaue City aron makatabang pagsulbad sa problema sa trapiko sa Sugbo.

Niadtong tuig 2015, ang Japan International Cooperation Agency mi-identify sa maong mga proyekto sa ilang Roadmap Study for Sustainable Development.

Gitataw ni Osmeña nga dili na siya mohatag og dugang detalye kalabot sa maong proyekto tungod kay giingong daghang kritiko ang mohimo og lakang alang sa kanselasyon sa mga proyekto.

Gitug-an ni Osmeña nga ang DPWH nagtrabaho na sa full detailed engineering sa proyekto sa siyudad aron mahibaw-an ang kantidad sa kinatibuk-ang budget niini. Gibutyag ni Osmeña nga ang tanang 25 ka infrastructure projects malakip sa budget proposal sa 2018 sa DPWH.

Si Osmeña nanghinaot nga ma-implementar na ang proyekto sunod tuig aron makatabang kini pagpaluag sa dagan sa trapiko sa dakbayan.

Asoy usab ni Osmeña nga ang construction sa mga flyover, skyway ug underpass mo-complement sa implementasyon sa P16.3 billion Cebu Bus Rapid Transit (BRT) Project sunod tuig.  - /BDB) (BANAT NEWS)