Lima ka pamilya sa Toledo gipahikling

CEBU, Philippines — Lima ka pamilya sa Sitio Hardin, Barangay Ilihan, dakbayan sa Toledo ang gipahiklin tungod sa pagtaas sa baha sa Sapangdaku  diin mikankan ug midahili ang yuta diha sa daplin sa sapa sa milabay’ng adlaw.

Ang City Disaster Risk Reduction Management Council (CDRRMC), Bureau of Fire Protection ug City Social Welfare and Development sa dakbayan sa Toledo ang nagtambayayong sa paghiklin sa  nahisgutang mga residente kansang mga balay  nahimutang sa ibabaw nga bahin. Ang maong mga residente gidala diha sa health center sa Barangay Ilihan.

Ang kapitan sa Barangay Ilihan Empetratriz Bantilan mibutyag nga adunay panimalay sa maong dapit ang gitabangan og alsa aron dili mabanlas sa baha.

Ang sakop sa city engineering office mibisita sa apektadong lugar diin aron ilang masuta kun angayan ba nga butangan og rip-rap ang kilid nga bahin sa sapa aron malikayan nga molapad pa ang pagdahili sa yuta. - /BDB) (BANAT NEWS)