Truckboy gidunggab og kutsara patay
CEBU, Philippines — Patay diha-diha ang usa ka truck boy human siya gidunggab sa iyang kaubang truck boy diha sa ilang buhatan sa Jhatt Global Development Corporation sa Sitio Bontores, Upper Mohon, Siyudad sa Talisay niadtong Biyernes sa tungang gabii. Ang biktima nailhan nga si Paul Anthony Oong, 26, lumad nga taga Barangay Marber, Bansalan, Davao Del Sur.
Samtang ang suspek mao si Christian Orillo, 19, gikan sab sa Davao Del Sur. Si SPO2 Cecilio Miñoza, imbestigador sa Talisay City Police Station niingon nga naglalis lang ang duha kun kinsa ang mosakay sa truck nga mobiyahe. Gumikan sa ilang panaglalis nasuko ang biktima dayun patid ngadto sa suspek. Nahitabo ang linayugay hangtud nga nibunot sa iyang gipahait nga kutsara ang suspek dayon dunggab sa walang dughan sa biktima.
Matud pa ni Miñoza nga wala magtuo ang biktima nga aduna’y gisuksok sa iyang hawak ang biktima nga iyang gipahait nga kutsara nga aduna’y gitas-on nga 7.5 pulgada.
Gideklarar nga dead on arrival ang biktima sa tambalanan. Hinuon nasikop sa mga kapulisan ang suspek.
Samtang nalandig sa tambalanan ang habal-habal driver human gidunggab sa iyang wa mailhing mga pasahero diha sa Sitio Pungsod, Barangay Lawaan 3, dakbayan sa Talisay.
Ang biktima nailhan nga si Emmanuel Pulvera, 24, nagpuyo sa maong dapit. Si PO2 James Cabrillos sa Talisay City Police Station nibutyag nga nanakay sa biktima ang mga mamumuno diha ilawom sa flyover sa Tabunok ug nagpahatud sa nahitaboan.
Apan pag-abot nila sa maong lugar nikanaug ang duha ug kalit nga gidunggab og icepick ang buko-buko sa biktima. Dali nga nidagan ang biktima palayo sa mga nidunggab kaniya. Ang mga kriminal ang nisibat sab palayo. Gidala sa Talisay City District Hospital ang biktima gumikan sa iyang samad dinunggaban.
Matud pa ni PO2 Cabrillos nga ilang gisusi karon ang background sa biktima kun aduna ba kini mga kaaway sa milabay nga mga adlaw. -/IBM) (BANAT NEWS)
- Latest
