Bana nipusil sa asawa

CEBU, Philippines — Asawa gipusil sa kaugalingong bana dihang nasakpan niya ang iyang bana nga nangluib sulod sa panimalay sa giingong kabit niini didto sa Barangay Don Virgilio Gonzales, lungsod sa Medellin, Probinsya sa Sugbo niadtong Biyernes sa gabii.

Ang asawa, 44 anyos, samtang ang bana niini 43 kansang mga pangalan gipugngan una sa Banat News.

Matud pa sa imbestigador sa maong kaso nga si PO1 Rosano Queding nga sa inisyal nga imbestigasyon nasuta nga gisulong sa ginang kauban sa ilang 16 anyos nga anak ang panimalay sa 30 anyos nga babayeng gipasanginlan niining kabit sa iyang bana.

Sumala pa nga didto nasakpan gyud sa ginang ang iyang bana nga nag- brief ug t-shirts na lang ang iyang bana kauban ang kabit niini.

Apan imbes nga motago, daw nakalitan ang bana ug gipusil hinuon niini ang iyang asawa diha sa dughan ginamit ang paltik nga kalibre .22 revolver.

"Mura man sad gud nga ngitngit, basin og nakalitan sad ba nga naay laing tawo," pasabot pa ni Queding.

Matud pa sa maong imbestigador nga bisan pa man og nakapamati na og pagpaminhod sa iyang dughan ang biktima nisukol pa kini sa ilang komprontasi sa kabit sa gawas sa maong panimalay samtang nitago sa kwarto ang bana. Gidala ang biktima sa iyang anak ngadto sa pinakaduol nga tambalanan.

Matud pa ni Queding bag-ohay lang nahibaw-an sa biktima ug sa mga anak niini nga adunay kabit ang ilang padre de pamilya pinaagi sa mga mingkatap nga mga hungihong sa ilang baryo.

"Mag-ulian man gihapon kuno sa ilaha pero usahay, daghan kuno kaayo og pasangil. Di kuno makauli kay trabaho kuno," si Queding miingon.

Matud pa nga nisamot ang pagduda sa asawa dihang nananghid ang iyang bana nga motrabaho bisan og day off niini.

Si Queding miingon nga nasuta nila nga kauban diay sa trabaho sa usa ka golf club sa barangay Dayhagon sa maong lungsod ang bana sa biktima ug ang kabit.

"Wala gyud kuno mibisita ang bana ngadto sa ospital. Kung nabalaka gyud to siya, siya untay nihatod paingon sa ospital. Pero wala man kuno matud pa sa ilang anak," si Queding miingon. Si Queding miingon nga sa pagkakaron mopasaka sila og kasong paghupot og armas batok sa bana.  Samtang mipadayag usab ang asawa niini nga mokiha og attempted murder sa iyang bana.

Niining pagsuwat, nagpaalim ug dili ra kritikal ang kahimtang sa biktima nga anaa sa tambalanan samtang natanggong karon sa prisohan sa Medellin ang bana niini  alang sa pagpasaka og kaso ugmang adlawa. - /IBM) (BANAT NEWS)