Pagdeklarar og dugang drug-cleared barangay nalangan
CEBU, Philippines — Nalangan ang pagdeklarar sa oversight committee sa mga bag-ong drug-cleared barangay sa Lalawigan sa Sugbo. Kini gumikan kay wala pay bag-ong director sa Philippine Drug Enforcement Agency (PDEA-7) human gibalhin sa Bureau of Customs si Atty. Yogi Felimon Ruiz.
Matud ni Meca nga wala pa gihapon magkatigom ang oversight committee aron paghisgut sa mga drug-cleared barangays sa probinsya ingon man kadtong mga barangay nga nameligrong matangtangan sa drug-cleared certificate human napakyas pagsunod sa mga parameters alang sa drug-cleared status niini. Si Meca nagkanayon nga hangtud wala pay bag-ong director sa PDEA-7 dili magkatigom ang oversight committee.
Ang PDEA director mao ang pangulo sa oversight committee nga gitahasan sa Dangerous Drugs Board nga maoy mo-evaluate sa mga barangay nga mo-apply alang sa drug-cleared status.
Ang komitiba gilangkuban sa PDEA, gobernador, CPADAO, Department of Health ug Philippine National Police. Sa pagkakaron matud ni Meca nga nagpadayon gihapon ang ilang monitoring sa mga barangay.
Kagahapon ang mga focal persons gikan sa nagkadaiyang anti-drug abuse councils sa mga barangay, lungsod ug siyudad sa probinsiya ang nipahigayon og coordination meeting aron pagpalig-on sa drug clearing operations.
Matud ni Meca nga ila sab gipatawag ang mga focal persons nga motabang sa CPADAO sa pag-monitor ug pagdumala sa mga drug clearing operation sa barangay.
Si Meca nagkanayon nga kasagarang problema nga gipagawas sa mga focal persons mao ang kalisud sa pagsustenir sa community-based treatment program.
“Mostly of the programs, project and activities, kay wala man gud ma-identify daan unsay drug problem sa barangay so mostly of the programs also are not implemented,” dugang ni Meca. (BANAT NEWS)
- Latest
