Bata namatay sa medical malpractice

CEBU, Philippines — Mosang-at og kaso ang inahan nga namatyan sa 10-anyos nga anak batok sa Talisay City Hospital ug sa mga doktor.

Kini human gituohan sa pamilya ni Lorna Palagtiosa, taga Barangay Lawaan 3, nga adunay kasaypanan ang tinugyanan sa tambalanan.

Si Palagtiosa nagkanayon nga niabot sila sa TCH niadtong Agosto 23 dala ang iyang anak nga lalaki human kini nakasinati og grabeng sakit sa tiyan.

Apan siya niingon nga gihatagan lang siya og resita kun unsa ang tumaron sa iyang anak.

Tungod kay dili sila kontento, nagpabilin sila sa tambalanan sa ilang emergency room.

Pipila ka adlaw ang nilabay, usa ka doktor ang nitambag nga ipaubos sa operasyon ang bata tungod kay adunay appendicitis.

Duha ka oras ang nilabay, usa ka doktor ang nisulti kanila nga malampuson ang operasyon apan pipila ka oras ang nilabay nirekomendar sila nga ibalhin ang bata sa laing tambalanan nga adunay kompleto nga kahimanan.

Agosto 28 gidala ang bata sa South General Hospital sa Siyudad sa Naga apan gideklarar kini nga dead on     arrival.

Gusto ang pamilya nga ipaubos sa autopsy ang patay’ng lawas sa bata aron mahibaw-an kun unsa ang hinungdan sa kamatayon niini.

Nasuta nga adunay internal bleeding ang tiyan sa bata gumikan sa surgical failure ug blood clot sa utok.

Nasuta sa autopsy nga namatay ang bata tungod sa multiple organ failure secondary to immediate complication of surgical procedure.

Matud ni Palagtiosa nga andam motabang kanila ang mga kawani nga ni-autopsy sa patay’ng lawas sa iyang anak aron masilutan ang nakaingon sa kamatayon niini.

Sa iyang bahin, si Dr. Joannes Paul Miranda, chief medical professional staff 2, niingon nga naghimo na sila sa ilang imbestigayson.

Iyang giseguro nga   ilang buhatan lakip na ang mga doktor ang naningkamot nga maluwas ang mga pasyente nga maabot sa ilang tambalanan.

Siya nitataw nga ila nang gipakigtagboan ang mga ginikanan sa bata sa niaging semana ingon man ang pagpatawag sab sa mga doktor nga nalambigit sa panghitabo.

Gipugngan lang una ang mga pangalan sa doktor tungod kay wala kini makuhai sa ilang habig. (BANAT NEWS)