Nagbasulay sa baha

CEBU, Philippines — Nagbinasulay karon ang executive department ug konseho sa dakbayan sa Sugbo bahin niining problema sa baha sa siyudad nga daw nahimong nagsanga-sangang sapa ang kadalanan tungod sa lapas tuhod nga baha kun magbunok ang uwan.

Kagahapong adlawa, sa press conference, ang mga taga oposisyon pinaagi ni City Councilor Joel Garganera miingon nga gibuhat na sa konseho ang ilang papel aron maatiman kining problema sa baha pinaagi sa pag-aprubar sa budget alang sa relokasyon sa mga pamilyang nagpuyo sa kilid sa mga sapa ug danger zones.

“The city government is not serious in its efforts in the problems of floods. There’s no program to address floods to think we are awash with cash..ang atong mga kadalanan pirmi na natong makita nga murag sapa kun mag-uwan," dugang pa niya.

Sumala pa ni Garganera ang Department of Public Works and Highways-7 migahin na og P750 milyones aron mabalik ang gilapdon ug gilawomon sa mga kasapaan apan nangayo  sila og tabang sa siyudad aron abagahon ang relokasyon sa namuyo  kilid sa mga sapa.

Matud pa ni Garganera ang buhatan sa mayor misugyot og P10 milyones para sa relokasyon, apan gihimo kini sa konseho og P100 milyones.

“Don’t you know that we have the oldest river in the Philippines? Colon Street nga nahimong river na karon kay everytime it rains, baha gyud na and anything can happen,”  pasumbingay pang Garganera .

Giawhag ni Garganera ang buhatan sa mayor nga ipatuman ang relokasyon sa mga nagpuyo kilid sa mga sapa aron mapalapdan na kini kay nagkapiot ug nagkamabaw na ang mga sapa hinungdan nga pirme gyud kining moawas padung sa kadalanan kun mag-uwan.

Si Cebu City Mayor Tomas Osmeña miingon nga kinahanglang limpyuhan ang mga kanal sa siyudad gikan sa mga basura kay mao kini ang makabara.

Apan iyang gibasol ang konseho kay matud pa niya babag sila sa iyang planong pagpalit og compactor trucks mao nga nangabang na lang sila niini.

Matud sa mayor ang compactor trucks usa sa gikinahanglan sa "Basura Mo, Sardinas Ko" program kay dili na mahago ang mga tawo sanglit igo na lang sila mobutang sa ilang basura sa truck ug bugtian kini og sardinas.

“We will tell them to get it (garbage) out and we will give sardines. In the meantime, don’t throw anything there. Otherwise, we will be spending more money in widening the drainage but still keep throwing garbage in the drainage, it’s not going to work,” matud sa mayor dugang sa pag-ingon nga kinahanglang responsable gyud ang katawhan sa paghipos sa ilang mga basura.

Apan kining gibuhat sa mayor dili madawat sa oposisyon nga usa ka programa kontra sa baha ug kwestyonable usab kay walay nakitang pagtuon kun epektibo ba o dili.

Si City Councilor Raymond Alvin Garcia, sa iyang bahin miingon nga 20 ka tuig na si Osmeña nga mayor sa siyudad apan wala gihapon masulbad kaning problemaha.

“If he was serious in addressing the problem on flooding, if naa kay vision for the flooding problem of Cebu, this could have been solved,” matud pang Garcia. Ug report gikan sa The Freeman (BANAT NEWS)