DJ Maxi nakapusil sa kawatan

CEBU, Philippines — Wala nalugos ug napusilan pa gani sa FM DJ nga si Marie Alexi Bolongaita o Maxi ang suspetsado nga si Reynante Comendador Mambiar matud pa sa hepe sa Investigation, Detection and Management Branch (IMDB) nga si Supt. Ryan Devaras kagahapon. Wala nay sapot sa ubos ang biktima hinungdan nga nagduda ang mga imbestigador kaniadto nga nahilabtan kini. Apan matud pa ni Devaras base sa autopsy report wala kini malugos ni Mambiar.

Si Bolongaita napalgang patay nga adunay duha ka mga samad pinusilan sa iyang dughan sulod sa gipuy-an niini sa NHA Road, Barangay Busay ning Dakbayan sa Sugbo niadtong Huwebes sa kaadlawon.

Butyag pa ni Devaras  nga miangkon si Mambiar sa maong krimen apan miklaro nga wala niya tuyoa nga mapatay ang biktima. Nasayran nga nisukol og maayo ang biktima gamit ang bolo ug gituohan nga iya sa biktima ang .22 rebolber nga nakuha sa crime scene.

Natigbasan ni Maxi ang suspetsado sa tuong abaga ug aping sa suspek ug giingong aduna usab kini samad pinusilan sa palad.

"Possible pud nga nakapusil siya (biktima) kay ang suspect naay agi sa bala diri (sa palad) naay gamay. Which is also ni-connect didto sa handgun nga nakita nato nga .22 caliber. Possible nga sa victim to (.22 caliber) kay sa suspect ingon siya nga .38 kuno iyang pusil. Which is balikon pa namo didto sa crime scene kay didto ra man kuno niya gilabay,” si Devaras miingon.

Gipaubos na sa paraffin test ang mga kamot sa biktima ug sa suspetsado aron masuta kun tinuod bang nakapabuto ang biktima. Si Devaras nagduda nga si Mambiar o mga kagrupo niini maoy responsable sa mga sagunson nga mga pagpangawat diha sa maong dapit nga hangtud karon wala pa masulbad.

Si Mambiar nadakpan na niadtong Agosto 29, 2017 sa kasong paghupot og shabu apan nakapiyansa.

 “Our laws are very lenient. In other places the laws are really a real deterrence like in Singapore get involve in drugs they kill you, and it’s judicial killings it’s not extra judicial killings and there’s no drugs in Singapore that’s why we really follow what they are doing in Singapore,” sigon ni Mayor Tomas Osmeña dihang gikuhaan og pamahayag bahin sa nahitabo kang Bolongaita.

Samtang si Konsehal Joel Garganera, chairman sa Cebu City Police Advisory Council mibasol sa paghitak sa ilegal nga drugas mao nga adunay mga tawong makahimo og krimen.

“I cannot fathom the pain sa amahan and also I am a father kana bang, it is a senseless killing because of drugs. I heard it is the same person nga nadakpan og drugs somewhere in Lorega,” sigon ni Garganera.

Gihimug-atan niya nga ang problema sa ilegal nga drugas nagkinahanglan og kooperasyon sa katilingban. (BANAT NEWS)