LPA gibantayan kun mapormang bagyo
Ang maong LPA, magdala og kasarangan ngadto sa makusog nga pag-ulan ug mga panugdog ug kilat sa probinsya sa Samar, Western Visayas ug Northern Palawan. www1.pagasa.dost.gov.ph
CEBU, Philippines — Adunay Low Pressure Area (LPA) sa Northern Visayas ug pagkusog sa hanging habagat ang masinati hinungdan nga ulanon gihapon karong adlawa ug ugma sa adlaw nga Domingo sumala pa sa Pagasa-Mactan.
Ang LPA giingong anaa sa silangan sa Catarman, Northern Samar, kung dili kini hingpit nga matunaw sulod sa duha ka adlaw, posible kining mahimong tropical depression ug tawgon kining bagyong Nando nga maoy ikatulong bagyo ning bulan sa Septiyembre.
Ang maong LPA, magdala og kasarangan ngadto sa makusog nga pag-ulan ug mga panugdog ug kilat sa probinsya sa Samar, Western Visayas ug Northern Palawan. Samtang hinay ngadto sa makusog nga ulan ang mabatyagan sa ubang parte sa Kabisay-an sama sa Central Visayas.
Matud pa ni Weather Specialist Romeo Aguirre, sa PAGASA Mactan, dili maayo mopahigayon og mga kalihukan sama sa trekking, mountain climbing ug ang pag-adto sa mga bukirang dapit, tungod sa kakuyaw sa mga pagdahili sa yuta ug mga bato, lakip usab ang posibleng pag-agas sa kasapaan.
Dugang pa ni Aguirre, ugmang adlawa makasinati og kainit sa panahon, apan aduna gihapoy mga katag nga mga pag-ulan ug gipanglantawan ang LPA matunaw sa adlaw nga Lunes kung kini di mapormang bagyo.
Ang PAGASA Mactan nitala na og kapin sa 200 millimeter rainfall measurement nga 120 porsiyentong taas sa normal nga 178.2 millimeters karong bulana. (BANAT NEWS)
- Latest
