Dul-an P500K nga shabu nasakmit

CEBU, Philippines — Mokabat sa P483 mil nga balor sa shabu ang nasakmit gikan sa lima ka durugista atol sa buy-bust operation sa Sitio Ponce Uno, Carreta, Dakbayan sa Sugbo niadtong Miyerkules sa gabii.

Matud sa hepe sa Mabolo Police Station, Supt. Emelie Santos, nga positibong napalitan ang subject sa operasyon nga si Gerald Malapit, 35, residente sa maong dapit.

Nadakpan sab ang kunsabo niini nga si Johnny Libo-on, 27-anyos.

Samtang sila si Roy Astro, 38; Jocar Lagatic, 24, ug Joshua Florendo, 21, naabtan sa kapolisan nga maoy paggawas ilang Malapit gikan nanuyop og shabu.

Pulos ra sab residente sa maong dapit ang maong mga dinakpan.

Nakuha gikan sa mga dinakpan ang 22 kabuok gagmay nga pakete ug duha ka medium nga pakete sa gituohang shabu diin ang tanan motimbang og 25 ka gramo.

Nakuha sab ang usa ka paltik nga Ingram kalibre .9mm nga armas gikan kang Malapit.

Kasong pagpamaligya og ilegal nga drugas ug ilegal nga paghupot og armas ang ipasaka batok kang Malapit samtang paghupot ug paggamit og shabu ang ipasaka nga kaso sa ubang dinakpan.

Samtang upat ka tawo ang nasikop atol sa Oplan Double Barrel Reloaded sa may Lower Pakigne, Lungsod sa Minglanilla niadtong Miyerkules sa gabii.

Ang nasikop mao sila si Risty Pangatungan, 28, nalakip sa watchlist ug usa ka street level target; Mark Daniel delas Peñas, 28, taga Sitio Hawod, Bulacao; Roberto Bandojo, 32; ug Job Unabia taga Bulacao, Talisay.

Matud ni Supt. Dexter Calacar, hepe sa Minglanilla Police Station, nga nasakmit nila gikan sa mga dinakpan ang 11 gramos nga shabu nga mobalor og P130 mil, kagamitan sa pagsuyop ug gituohang halin sa ilegal nga drugas. (BANAT NEWS)