Shabu lisud na ipalusot sa Talisay CJ
CEBU, Philippines — Tungod sa ka kusog sa bunok sa uwan, wala dayon nasugdi ang hiniusang greyhound operation sa Talisay City Jail niadtong Miyerkules sa hapon.
Ang greyhound operation gihimo sa Talisay City Police, mga sakop sa Talisay City Jail ug sa taga Philippine Drug Enforcement Agency (PDEA-7).
Kini aron masuta sa tanan nga lisud na gyud sa mga binilanggo sa maong pasilidad sa pagpalusot og mga kontrabando.
Tuod man ang mga tinugyanan sa balaud nakakuha lang og usa ka cutter, duha ka improvised tooter, 12 ka lighters, usa ka cellphone, pito ka gunting, usa ka USB, walo ka linukot nga dahon sa lomboy, 13 ka aluminum foil, 70 ka lapis, 85 ka ballpen, unom ka posporo, upat ka sets sa baraha, 16 ka bola sa bilyard ug 30 ka nail cutter.
Si Supt. Jason Villamater, hepe sa kapolisan sa Siyudad sa Talisay nagkanayon nga lisud gyud para sa mga piniriso nga mopalusot og kontrabando sa pasilidad.
Gani sa ilang paghimo sa greyhound operation, iyang napamatud-an nga naghimo lang og estorya si Ricardo Cabanes nga gikan sa Talisay City Jail ang drugas nga nakuha gikan kaniya nga moabot sa tunga sa milyon ka pesos.
Una niini, si Supt. Gil Inopia, warden sa Talisay City Jail, wala nakatuo sa pamahayag ni Cabanes. Siya nagtuo nga nagbuhat lang og estorya si Cabanes aron lawgawon ang ilang buhatan.
Si Inopia sukad siya nilingkod isip warden iyang gipatuman nga mga paryente lang sa piniriso ang pwedeng makadalaw ingon man gihimo ang inadlaw nga greyhound operation sa matag cottage aron sa pagseguro nga wala gyu’y mga kontrabando nga makasulod sa ilang pasilidad.
Tungod niini, ang TCJ ang gipaarakan na makaduha ka higayon. Nagtuo si Supt. Inopia nga ang pagpangrakrak gihimo sa mga tawo nga naapektuhan sa iyang istriktong polisiya sa ilang pasilidad. (BANAT NEWS)
- Latest
