Barangay kagawad nadakpan tungod sa drugs ug armas

CEBU, Philippines — Barangay konsehal sa Barangay Singko, Lungsod sa Tuburan nasikop pinasikad sa search warrant human masakmiti og usa ka armas ug pipila ka pakete sa shabu kagahapon sa buntag.

Nasikop sulod sa iyang panimalay si Maurice Perales human masakpi nga adunay usa ka .38 revolver nga adunay upat ka mga bala niini, usa ka medium nga pakete ug tulo ka gagmay’ng pakete sa gidudahang shabu.

Ang maong search warrant pinirmahan ni Judge Jerry Dicdican sa Regional Trial Court 25 sa Dakbayan sa Danao.

Matud pa sa hepe sa kapolisan sa Tuburan nga si Police Supt. Marlu Conag nga gi-monitor nila ang maong opisyal dihang nakadawat sila og mga taho nga nalambigit kini sa ilegal nga drogas.

Nilig-on ang maong taho batok kang Perales sa dihang migawas ang pangalan niini gikan sa dinakpan sa buy-bust operation sa kapolisan sa lungsod sayo niining buwana matud pa ni Conag.

Dugang gibutyag sa maong hepe nga tiggamitan og shabu ang maong opisyal ug giawhag na kini sa ilang barangay kapitan nga moundang na niini atol sa Oplan Tokhang, apan wala na kini mopatuo.

Si Conag miingon nga ang maong armas ug drugas ang subject sa search warrant batok kang Perales.

Atol sa implementasyon sa maong search warrant, rondahon sab unta sa mga otoridad ang laing barangay konsehal sa maong lungsod nga si Emilio Castro Jr.tungod gihapon sa paghupot og armas.

Apan nagkaproblema sila sa teknikalidad sa ilang gisilbing search warrant.

“Ang nasa search warrant kasi Barangay 5 pero nang pumunta kami ay nasa boundary na siya ng Barangay Cogon,” matud pa sa maong hepe.

Maayo na lang nga gitahan ra dayon sa maong konsehal ang iyang .22 magnum revolver sa kapolisan. (BANAT NEWS)