DJ sa radyo gipatay

CEBU, Philippines — Kanhi Ms. KBP 2016 ug Disk Jockey sa 89.1 Power FM  Maxie Alexie Bolongaita, anak sa beteranong anchor Alex Bolongaita ang gipusil patay sa gituohang kawatan diha sa sulod sa duplex nga gipuy-an niini sa may NHA Road, Barangay Busay ning Dakbayan sa Sugbo kagahapon sa kaadlawon.

Si Bolongaita,29 anyos, dalaga, nagtrabaho usab isip call center agent gikatahong nisukol ug nakigbugno sa gidudahang kawatan nga si Renante Comendador Mambiar, 36, taga Lahug.

Si Mambiar nadakpan niadtong miaging buwan tungod sa ilegal nga drugas apan nakagawas human nakapiyansa sumala pa sa kapolisan.

Matud pa ni Senior Police Officer 3 Rommel Bangcog sa Homicide Section paladman pa nila ang imbestigasyon niini.

Dugang pa ni Bangcog, base sa initial nga nakita nila kang Bolongaita aduna kini duha ka samad sa dughan agi og pinusilan apan ilaha pa sutaon ang resulta sa otopsiya.

Nakuha diha sa crime scene ang .22 revolver, dunay lima ka kabhang ug tulo ka buhing bala, ug sundang nga adunay 46-pulgadas ang gitas-on.

Si Alex, amahan sa dalaga sa iyang bahin miisip ni Maxi nga dili lamang usa ka anak ug usa usab ka higala. Matud niya dili niya madawat ang kamatayon sa iyang pinangga nga anak.

Sumala pa ni Bolongaita ang caretaker sa maong apartment nitug-an kaniya nga nakakita kini og tawo nga nikatkat sa ilang water tank. Mahinangpon si Bolongaita nga dali ra ang pagkasikop sa nagpatay sa iyang    anak.

Matud pa adunay nakasaksi sa panagway sa suspek nga nakakita nga nisulod sa panimalay ni Maxi ug positibo nga miila kaniya diha sa pampublikong tambalanan.

Sumala pa nga ang suspek nibahad nga iyang pusilon kadtong saksi nga nakakita kaniya ug dili kini pasundon. Ang iyaan ni Mambiar, nitug-an nga nanuktok sa ilang balay ang iyang pag-umangkon kay nangayo og tabang ug magpadala kini sa tambalanan kay kini gipusil. (BANAT NEWS)