P60M pangayuon sa Capitol Tourism sunod tuig
CEBU, Philippines — Gibana-banang moabot sa P60 milyones ang pangayuon sa Provincial Tourism Office nga budget alang sa tuig 2018.
Ang maong pondo igahin kini sa nagkadaiyang programa ug proyekto sa PTO diin matud ni Joselito "Boboi" Costas, ang pangulo sa buhatan, nga magtutok sila sunod tuig sa mga proyekto sa inprastraktura sa mga tourist destinations.
"We are looking at toilets and infrastructure that would provide safety and convenience to our guests," matud ni Costas.
Gawas sa inprastraktura, ang PTO mo-implementar sab sa "home stay program" sa mga lungsod nga adunay mga tourist spots.
Matud ni Costas nga target nila nga makatukod og infrastructure projects sama sa foot walk, information centers, signages ug ingon man souvenir shops.
Adto kini itukod sa mga destinasyon sa Dalaguete, Boljoon, Minglanilla, Argao ug ingon man sa Aloguinsan.
Gawas sa infrastructure, matud ni Costas nga magpadayon sab sila sa capacity building dili lang sa mga komunidad lakip na sa ubang stakeholders.
Ang PTO adunay budget nga P10.5 milyones karong tuiga diin buot ni Costas nga sunod tuig mo-kaunom ang ilang kasamtangang budget aron mapatuman ang ilang mga plano nga mga proyekto. Ang executive department gikatakdang magsugod sa budget deliberation alang sa budget proposal sunod tuig ugmang adlawa. (BANAT NEWS)
- Latest
