Jail koralon og pukot

CEBU, Philippines — Butangan og net ang palibot sa Talisay City Jail aron dili na kaitsahan og kontrabando gikan sa gawas human nakit-an sa CCTV camera nga usa ka lalaki ang nagtaptap sa nawong ang niitsa og lima ka kaha sa sigarilyo sa sulod. Matud ni Supt. Gil Inopia, warden sa TCJ,  nga iya na nga gihangyo ang kagamhanan sa siyudad nga mabutangan og net ang ilang pasilidad. Ang koral sa TCJ moabot sa 20 metros apan maabot gihapon sa mga ilegalista ang pag-itsa sa mga butang.

Armado nakuratan nasikop

Imbis tigpayuhot og ilegal nga drugas ang tuyo sa mga operatiba sa Talisay City Police Station, armadong lalaki ang nasikop sa Sitio Galaxy, Barangay Tangke kagahapon sa kadlawon. Ang dinakpan nailhan nga si Jovie Mabanto, 24, kinsa nakuratan dihang nakakita sa kapolisan nga nisulod sa usa ka hagip-ot nga dalan aron unta pagpangita sa gikatahong tigpayuhot og ilegal nga drugas sa lugar. Si Mabanto gisita ug nakuhaan og usa ka .38 nga revolver hinungdan nga gidakop.

Money changer gikawatan

Maoy gipunit ang bag sa money changer sa kawatan nga gibadlong sa iyang pagsulod sa establisemento nga walay tuyo sa Sitio Sangi, Tabunok, Dakbayan sa Talisay niadtong Martes sa alas 9:15 sa buntag. Si Helen Portasion, 57, igo na lang sa pagpa-blotter dihang gipunit sa nailhan lang nga Badjao ang iyang bag nga may sulod P9,300 ug cellphone nga kantidad og P1,000. Matud pa nga dali nga nisakay og jeep pasaheroan si Badjao ug wala na gyud kini maabti sa biktima.

Larangonon gikawat

 Gihurot sa pagkuha sa wala mailhing mga kawatan ang tanang lutuonon sa larangan sa eskina sa South Road Properties (SRP) sa San Isidro, Dakbayan sa Talisay niadtong Martes sa kadlawon.  Naminghoy si Anastacio Baclay Jr., 40, taga Corazon Village, San Isidro human nahanaw na ang tanan niyang lutuonon.  Naglakip sa mga gikawat ang usa ka sakong mais balor og P1,350, usa ka unit nga impact drill nga P10 mil, usa ka grinder nga P5 mil, hammer claw nga P2,175; 15 kilos nga pork ribs nga P260, duha ka sets sa butane nga P1,100; 18 kilos nga isda nga P3,240 mil, usa ka set party décor ug giveaways nga P3,100; duha ka bag sa grocery nga P1,500 ug kwarta nga P600. (BANAT NEWS)