Negosyante gipusil patay

CEBU, Philippines — Patay ang usa ka negosyanteng biktima sa pagpamusil sa nagtaptap nga armadong lalaki diha sa Purok Limonsito, Barangay Umapad, Dakbayan sa Mandaue alas-8 pasado ang takna sa miaging gabii.

Si Police Officer 2 Juanito Libres sa Presinto 5 sa  Mandaue City Police Office (MCPO) miila sa biktima nga mao si Candelario Salepan Roa Jr., 43, nagpuyo sa maong dapit.

Matud pa ni Libres nga naglingkod lang ang biktima sa atubangan sa ilang panimalay nga nahimutang sa maong dapit dihang giduol kini sa wala hiilhing lalaki ug kalit gipusil sa ulo.

Human sa maong pagpamusil dali nga misibat ang mamumuno nga nagsakay sa gi-parking nga motorsiklo ug mipabulhot palayo.

Duha ka mga saksi ang miingon nga ang mga armadong lalaki nga nagpusil sa biktima nagtaptap og panapton sa ilang mga nawong.

Nagsul-ob kini og t-shirt og maong ang karsones og ilang gibanabana nga anaa sa 30 kapin ang panuigon, kasarangan lamang ang gidak-on sa panglawas ug 5' 6"  ang pamarog. Padayon pa karon ang imbestigasyon sa maong pagpamusil sa pag-ila sa suspetsado ug pagsuta sa motibo niini. (BANAT NEWS)