Bag-ong salta sa drugas sikop

CEBU, Philippines — Nasikop ang duha ka durugista sa kapolisan sa Siyudad sa Talisay kagahapon sa buntag sa Sitio Kanipaan, Barangay Pooc.

Si PO2 James Cabrillos nibutyag nga subject sa operasyon mao si Rosval Restauro, 30, ulitawo nga nagpuyo sa maong dapit.

Matud ni Cabrillos nga bag-o lang salta sa negosyo sa ginadiling drugas si Restauro.

Si Restauro nagkanayon nga naghinay-hinay siya og repack sa shabu aron iyang ipadala sa Bohol aron konsumo sa iyang mga amigo.

Samtang usa ka lalaki ang nasikop atol sa buy-bust operation sa Magay, Compostela niadtong Lunes sa gabii.

Ang nasikop mao si Tomas Velasco, 50, ulitawo, residente sa maong lugar.

Matud sa hepe sa kapolisan sa Compostela, Senior Inspector Junafe Vergara, nga bag-ong naila nga drug pusher si Velasco kinsa nasakmitan og pipila ka putos sa drugas lakip ang mga kagamitan sa pagsuyop.

Sa laing bahin nadakpan ang unom ka pusher og shabu sa sunod-sunod nga buy-bust operation sa kapolisan sa Lungsod sa Consolacion.

Unang nadakpan sila si Regal Antigua Alivio, 34; Jeppel Ompad Tuico, 32, ug Urbano Talingting Arcilla, Jr., 52, pulos taga District 1, Barangay Pulpogan.

Nakuha gikan sa tulo ka dinakpan ang unom ka gagmay nga pakete sa shabu ingon man mga kahimanan sa paggamit niini.

Dugang nadakpan sa mao gihapon nga dapit mao ang managsuon nga sila si Ernesto Caliso Lasaga, 37;  Abeser Caliso Lasaga, 42, ug Reymar Garcia Rio, 32, pulos nagpuyo sa maong dapit.

Si Police Officer 1 James Michael Borres sa Consolacion Police Station niingon nga ang high-value target nga si Rio maoy ilang target.

Ang managsoon nga Lasaga nakuhaan sab og tagsa ka gagmay nga pakete sa shabu ug mga drug paraphernalia. (BANAT NEWS)