Gibuwagan uyab gi-hostage
CEBU, Philippines — Usa ka 37 -anyos nga lalaki ni-hostage sa iyang 36- anyos nga hinigugma tungod kay dili niya madawat nga bulagan na siya niini didto sa Purok Kwatro, Barangay Nangka, Consolacion.
Ang suspetsado giila nga si Gerald Wagas Malagar ,37, residente sa Sitio Looc, Barangay Poblacion, lungsod sa Liloan.
Matud pa sa imbestigador sa maong kaso nga si SPO1 Marjorie Paller sa Consolacion Police Station nga nagtipon kaniadto ang duha didto sa Dakbayan sa Mandaue.
Apan milayas ang biktima kay pirme kining kulatahon ni Malagar adlaw-adlaw.
Nunot niini, midangop sa iyang mga paryente didto sa Consolacion ang dalaga sayo niining buwana apan niadtong Lunes giapas kini sa suspetsado kinsang nagdala og kutsilyo.
Sa affidavit sa biktima, giestoryahan niya ang suspek nga buot na niyang putlon ang ilang relasyon.
Apan nasuko ang suspetsado kay dili kini mosugot nga buwagan ug kalit kining nahimong bayolente ug giguyod ang biktima pasulod sa usa sa mga lawak sa maong balay ug gitionan kini og kutsilyo.
Ang biktima misuway pag-ilog sa kutsilyo apan nasamad hinuon ang kumingking niini sa kamot ug nalupig sa suspek.
Nagsugod ang maong komosyon alas siyete sa gabii, ang imbestigador miingon.
Gialam-alaman sa mga paryente sa biktima ang suspetsado sulod sa 30 ka minutos hangtud nga naagni nila kini nga buhian nga ihatag ang kutsilyo ngadto sa usa sa mga pag-umangkon sa biktima.
Pag-abot sa mga polis gidakop kini ug gikatakdang pasakaan og kasong attempted homicide in relation to RA 9262 o ang Violence Against Women and Children. (BANAT NEWS)
- Latest