Warden di motuong gikan sa TCJ ang shabu
CEBU, Philippines — Dili makatuo ang warden sa Talisay City Jail nga si Supt. Gil Inopia sa alegasyon sa dinakpan nga si Ricardo Cabanes nga gikan ang shabu nga nakuha gikan kaniya didto sa TCJ.
Ang nakuha kang Cabanes moabot sa kapin tunga sa milyon ka pesos nga shabu. Si Inopia nagkanayon nga matag adlaw sila naghimo og greyhound operation sukad nga nilingkod siya isip warden sa maong prisohan hinungdan nga lisud para niya nga motuo sa pangangkon ni Cabanes.
Hinuon iyang giangkon nga si Cabanes mosulod sa ilang pasilidad kaniadto sa dihang anaa pa si Steve Go gibilanggo sa maong prisohan.
Gani nakita man sa ilang rekord nga kaupat ka higayun siyang nibisita ni Go niadtong Hunyo 4, 6, 13 ug 16.
Matud pa ni Supt. Inopia nga nisuway pagsulod si Cabanes sa miaging semana apan wala na kini tugoti kay si Go gibalhin na og laing prisohan ug mga paryente na lang ang gitugutan nga makadalaw sa mga bilanggo.
Si Inopia makig-alayon sa kapulisan aron mahibaw-an ang impormasyon nga gihatag ni Cabanes diha kanila.
Si Cabanes nasikop sa City Drug Enforcement Unit ug City Intelligence Branch pinanguluhan ni Chief Insp. Christopher Navida didto sa Sitio Lawis, Pasil, Siyudad sa Sugbo. (BANAT NEWS)
- Latest
