P500 mil ang danyos sa sunog sa Suba

CEBU, Philippines — Gibana-banang P500 mil ang danyos sa nahitabong sunog sa dalan Santo Niño, Barangay Suba niadtong Lunes sa gabii diin 23 ka balay ang gikaon sa kalayo.

Alas 6:11 sa gabii nadawat sa Bureau of Fire Protection (BFP) 7 ang tawag ug giisa dayon kini sa Task Force Alpha, matud pa ni BFP-7 public information officer Insp. Marlyn Macatangay ug nakontrolar alas 7:16 sa gabii. Giimbitar sa BFP silang Marife ug Mario Espinosa tungod sa impormasyon nga  gikan sa ilang panimalay nagsugod ang maong sunog. Matud pa ni Cebu City Fire Marshal Rogelio Bongabong naglisod sila pagsud sa lugar tungod sa kadaghan sa mga naka-parking nga mga sakyanan ug ingon man ang mga trisikad.

Unang anggulo nga gisubay sa hinungdan sa maong sunog nga adunay mga bata nga nagduwa-duwa og posporo, ikaduha mao ang posibleng pagbuto sa mga refilled butane nga maoy gigamit sa pagpangluto ug ang ikatulo mao ang illegal nga wiretapping.

Nasayran nga nasunogan na usab ang maong barangay niadtong Nobiyembre sa miaging tuig. Nunot niini, giawhag ni Bongabong nga mamahimong responsable sa mga butang sa balay ilabi na sa mga wirings niini.

Lakip sa iyang pahimangno mao ang undangon na sab ang paggamit og mga refilled butane tungod kay delikado kini nga mobuto tungod kay LPG na ang sulod niini apan nipis ang lata nga gisudlan niini.

Samtang gibutyag sa pangulo sa Division for the Welfare of the Urban Poor (DWUP) Atty. Meriam Fernandez nga gipanag-iya sa siyudad ang luna nga gitukuran sa mga panimalay nga nasunog. Nagkanayon si Fernandez, ang maong dapit kabahin sa Slum Improvement and Resettlement (SIR) program  nga gipuy-an sa 41 ka pamilya.

Gipasabot ni Fernandez makabalik ra sa ilang pinuy-anan ang mga nasunogan apan i-survey una kini og balik sa DWUP kun kinahanglan bang mag re-blocking.

“Sacrifice gyud na siya, para lang gyud dili mausab kay tendency man gud if wala puy agianan in terms of mga disasters wala sad tay pamaagi kun unsaon nato pagsulod,” sigon ni Fernandez. (BANAT NEWS)