Stampmaker nasakmitan og P500,000 shabu
CEBU, Philippines — Mokabat sa kapin tunga sa milyon ka pesos ang nasakmit nga drugas sa kapolisan gikan sa usa ka 50-anyos nga stampmaker, kagahapon sa Sitio Lawis, Pasil, Siyudad sa Sugbo.
Ang suspek giila sa ngalan nga si Ricardo Cabanes kinsa gidakop sa operatiba sa hiniusang pwersa sa City Drug Enforcement Unit ug City Intelligence Branch nga gipangulohan ni Chief Inspector Christopher Navida.
Siyam ka medium-sized nga pakete sa shabu ang nakuha gikan sa suspek nga kantidad og P531,000.
Ang suspek nibutyag nga kini ang unang higayon sa iyang pagdawat og bulto nga drugas nga gikan sa piniriso sa Talisay City Jail nga ginganlan og “Brad”.
Matud niya nga ang ilang komunikasyon gikan sa sulod kay cellphone diin mo-text ang supplier sa detalye kung asa ug kang kinsa kuhaon ang supply.
Samtang tricycle driver nga gikapoy sa pagpamasahero ang namaligya og ginadiling drugas hinungdan nga nadakpan sa Sitio Magay, Tangke, Dakbayan sa Talisay niadtong Domingo sa buntag. Ang dinakpan mao si Roche Amagos, 40, nagpuyo sa maong dapit.
Si PO3 Junyl Ater sa Talisay City Police Station niingon nga gigamyan seguro sa iyang kinitaan sa pagpamasahero ang suspek hinungdan nga namaligya na lang kini og shabu. Nakuha gikan sa suspek ang unom ka gagmay nga pakete sa shabu nga kantidad og P2,400. (BANAT NEWS)
- Latest
