Rama maoy ipuli kang Abella?

CEBU, Philippines — Usa ang ngalan ni kanhi Cebu City mayor Michael Rama sa posibleng pilian nga mohulip sa bakanteng posisyon nga biyaan ni Konsehal Nendell Hanz Abella human nga nisumetir na kini sa iyang resignation letter kagahapon kang Vice Mayor Edgardo Labella.

Sa miaging adlaw mihurar na si Abella isip Commissioner sa National Labor Relations Commission (NLRC) 7th Division nga nag-representar sa mga mamumuo.

Ang mga konsehal sa Barug Team Rama mipahalipay kang Abella ug sila miingon nga ang maong trabaho haom kaayo kaniya.

Matud ni Konsehal Raymond Garcia gikatakda nga ilang tukion kung kinsa ang mopuli kang Abella karong adlaw nga Huwebes. Si Garcia miingon nga base sa balaod ang partido kun diin gikan si Abella maoy mopili sa mohulip sa mabakanteng posisyon nga biyaan ni Abella kinsa niadtong higayuna ubos man sa United Nationalist Alliance (UNA).

Matud pa ni Garcia daghang mga pangalan ang nanggawas  ug usa niini  si kanhi mayor Rama, Inayawan Barangay Captain Lutherlee Ignacio-Soon, Junjun Osmeña ug uban pa.

Samtang wala pay mohulip kang Abella magtabla ang mga konsehal sa Bando Osmeña Pundok Kauswagan (BOPK) ug ang Barug Team Rama ug kun pananglitan dunay botasyon si Vice Mayor Edgardo Labella maoy mobuak sa panagtabla. (BANAT NEWS)