Banat ( Leaderboard Top ), pagematch: 1, sectionmatch: 1

2 bata nangapaig

CEBU, Philippines — Nangapaig ang duha ka managsuong nag-edad og singko ug dos anyos dihang nasunog ang ilang panimalay sa Barangay Manguiao, Lungsod sa Asturias, Probinsya sa Sugbo kagahapon sa udto.

Ang namatay sa sunog mao sila si Manilyn Faith,5, ug Mark France Palicte ,2, nga giingong gibilin sa ilang inahan kay niadto kini sa ilang umahan.

Matud pa sa imbestigador sa maong kaso nga si Fire Officer 2 John Abellanosa miadto sa umahan ang inahan sa mga bata nga si Maria Palicte, 26, samtang nagtrabaho sa usa sa mga construction site sa Dakbayan sa Sugbo ang amahan nga si Fransisco Palicte.

Giingong dili gusto sa inahan sa mga bata nga ibilin ang mga anak ngadto sa iyang ugangan tungod kay pipila na ka higayon niyang masakpi nga bunalan kini sa apohan sumala pa ni  Abellanosa.

Wala dayon matabang sa mga silingan ang maong sunog tungod kay kadaghanan kanila nanglakaw aron mokobra sa ilang 4P’s o ang Pantawid Pamilya Program sa gobiyerno.

Apan si Abellanosa mibutyag nga usa ka nagpailang Cherry Mae Jumag, 32, silingan sa mga Palicte ang nakakita nga nagdilaab na ang balay  ug misuway kini pagsalbar  sa duha ka mga bata nga na-trap sa sud apan wala gyud kini makaatraka sa kainit.

Gidagan na lang ni Jumag si Maria ngadto sa umahan aron pahibaw-on sa sitwasyon sa ilang panimalay. Apan pag-abot ni Maria naugdaw na ilang balay uban ang iyang mga anak.

Ang imbestigador miingon nga niadtong gabii sa Miyerkules pa hapit na masunog ang ilang panimalay human maabti ni Maria nga gidakop na sa ilang kurtina ang kalayo gikan sa lighter nga giduwaan ni Manilyn ug dali niya kining napawong.

Tungod sa maong impormasyon, nagtuo si Abellanosa nga posibleng nagduwa na pud og lighter ang maong bata  ug aksidenteng naduslitan ang mga butang nga paspas kaayong masunog.

Sumala pa ni Abellanosa, wala silay nakitang foul play sa maong insidente tungod kay matud pa nga ang amo ni Maria nga si Vella Tucaldo, konsehal sa ilang barangay mipatim-aw nga anaa gyud   nagtrabaho sa iyang umahan si Maria niadtong oras nga nahitabo ang maong sunog. Giingong mipauli na usab ang amahan sa mga bata alang sa pagpalubong kanila. (BANAT NEWS)

  • Follow Us: